Ang gilay-on

Ang gilay-on sa bolamano ug sa object ball ug ingon man ang gilay-on sa object ball ngadto sa pocket usa sa angay hatagan og konsiderasyon diha sa pag-apply og kusog ngadto sa tako aron pagpahigayon og usa ka tayada.

"The closer the balls are together, the less the backspin required. Too much screw and you have a screw shot, too little and you have stun run-through. Experience must be your guide," nagkanayon ang respetadong sportsperson nga si Ashok Kumar sa usa sa iyang mga sinulat nga basahon mahitungod sa paugnat sa kusog.

Husto si Kumar. Kun kusog gud ang backspin sa magdudula, seguradong kusog ang himuon niyang tayada. Kun hinayan sab niya ang backspin, nagpasabot kini nga menos ang kusog nga iyang gi-apply ngadto sa tako. Nagpasabot kini nga hinay ang iyang tayada. Hinay sab ang epekto niini ngadto sa bola nga gitirahan.

Dinhi angay magmabinantayon ang magdudula. Kinahanglang may katakus siya sa pagbana-bana mahitungod sa sukod sa kusog nga iyang gamiton sa iyang pagtira kun gusto siya'g maayong resulta sa dula. Ang gikusgon sa pagtira magdepende sa plastada sa mga bola sa ibabaw sa lamesa, sa ilang gilay-on ngadto sa pocket ug sa nakita nga opening alang sa sunod na usab nga tira.

Dunay tayada nga bisan duol ra kaayo ang bola sa pocket kinahanglang kusgon aron ang bolamano makamugna og opening aron pagtira sa laing object ball. Duna usab ing tayada nga bisan layo ang object ball nga gitirahan apan hinay o igo-igo lang ang gikusgon sa pagtira kun maoy tuyo ang pagmugna'g opening alang sa lain na usab nga tayada. Mao nga ang pagbana-bana sa gikusgon sa tayada magdepende sa game plan sa magdudula ug basi usab sa plastada sa mga bola sa ibabaw sa lamesa.

Ang hustong pagbana-bana sa magdudula sa gikusgon sa iyang tayada iyang madeterminar pinaagi sa makanunayon nga pagbansay. Daku gyud og ikatabang ang pagbansay sa pagkontrol sa magdudula sa iyang kaugalingong kusog ug katakus. Seguradong makuha niya ang gikinahanglang rhythm sa pagdula kun kanunay siyang magbansay. Dili sab mabakikaw ang magdula tungod sa muscle control.

* * *

(Mga sugyot ug pakisayod? Text sa 0910-8105522)