Pacquiao 6th highest-paid athletes

CEBU, Philippines – Si Pinoy boxing superstar Manny Pacquiao natala sa Forbes magazine isip ikaunom nga highest-paid athlete sa tibuok kalibutan gumikan sa pagkita niini og 40 milyones dolyares sa milabay'ng 12 ka bulan kun dul-an sa P2 bilyones sa kasamtangang foreign-exchange rate.

Gitaho sa maong prestihiyosong magasin sa online edition niini nga si Pacquiao mihipos og kinatibuk-ang $30 milyones sa duha niini ka away batok nilang Oscar de la Hoya ug Ricky Hatton. Gipalukapa ni Pacquiao ang duha sa makapakurat nga pamaagi aron pagpalig-on sa iyang estado isip pound-for-pound king.

Si Pacquiao nahimo sab nga endorser sa duha ka higanteng kompaniya -- Nike ug San Miguel Beer.

Si De la Hoya nahitala lamang sa ika-13 nga dapit uban ni baseball star Alex Rodriguez nga adunay $32 milyones.

Bisan og nawala sa aksiyon sud sa walo ka bulan gumikan sa knee injury, si Tiger Woods nagpabiling 'best paid sportsman' sud sa walo na ka sunod-sunod nga tuig gumikan sa pagkita niini og $110 milyones sa miaging tuig.

Sila si Los Angeles Lakers superstar Kobe Bryant, NBA legend Michael Jordan ug Formula One daredevil Kimi Raikkonen nagtabla sa ikaduhang dapit sa ilang $45 milyones gikan sa Hulyo 2008 hangtod sa Hunyo 2009.

Si Bryant bag-o lang migiya sa Lakers ngadto sa ika-15 niining kampiyonato sa NBA ug ikaupat sa iyang career uban sa LA franchise. Gawas sa iyang $21 milyones nga suweldo uban sa Lakers, si 'Black Mamba' mikita sab og daku sa pag-endorse niini sa Nike, Upper Deck, Activision ug VitaminWater.

Si Jordan, bisan og retirado na isip player, maoy nagpabiling labing sikat nga atleta sa Amerika. Gawas nga part owner sa Charlotte Bobcats, ang Jordan Brand hapit na mo-abot ang halin ngadto sa $1 billion alang sa Nike.

Bisan mitapos lamang siya sa ikatulong dapit sa F1 World Championships sa miaging tuig, si Raikkonen mao gihapon ang nagabaton og labing dakung kita sa tanang F1 drivers karon.

Nahitala sa ikalima nga dapit mao si football great David Beckham, kinsa mikita og $42 million. Nagkapyot sa ikasiyam   mao si motorcycle racing superstar Valentino Rossi nga nakahipos og $35 million ug gisundan ni NASCAR driver Dale Earnhardt Jr. nga nakadeposito og dugang $34 million sa iyang bank account.

Mikompleto sa top 20 sa maong listahan mao sila si tennis wonder Roder Federer ug NBA celebrity Shaquille O'Neal ($33 million), golf prodigy Vijay Singh ($31 million), NBA icon Kevin Garnett, NASCAR driver Jeff Gordon, soccer star Rolandinho ug baseball hero Derek Jeter nga pulos mihipos og $30 million. – BANAT NEWS