Yan C Rico kampiyon na sa LLBA summer league

CEBU, Philippines – Sa labing unang higayon, gipukan sa Yan C Rico ang karibal nga John Videoke, 92-89 aron pagsakmit sa korona sa Lapu-Lapu Basketball Association (LLBA) Summer League 2009 didto sa Bliss Pajac open court sa dakbayan sa Lapu-Lapu.

Ang Yan C Rico ni team owner Atty. Rico Amores ug coach Billy Nadado gilupig sa arangkadahay sa John Videoke sa unang duha ka kuwarter, apan mipatuman kini og hugot nga depensa ngadto nilang Benjie Tomaquin ug 3-point artist Elde Daluz sa third quarter hangtod nga ilang nailog ang momentum.

Si Michael 'Micmac' Macasero, kinsa maoy napiling MVP maoy nangulo sa topscorer sa Yan C Rico pinaagi sa iyang 18 puntos, gisundan nila ni Gomez, Ybañez ug Velasquez nga parehong miabuno og double figures.

Si Gomez mipupo og 12 puntos, samtang si Ybañez miani og 11 puntos ug si Velasquez mihagpat og 10 puntos alang sa Yan C Rico ni team manager Rey Inot.

Ang naparot nga John Videoke gipangulohan sab ni Versoza nga miugkat og 16 puntos.

Ang LLBA Summer League gipaluyohan sab ni Hon. Mayor Arturo 'Boy' Radaza, Hon. Brgy. Capt. Paz Radaza, Maribago Seaview Penzionne, Tambuli Beach Resort, FIBA, 13K Motor Parts, Overseas Courier Service, Cebu Nisico Phils. ug sa Boylen Marketing.

Namugna sab ang LLBA Summer League pinaagi sa paningkamot sa ilang presidente nga si Allan Sepe uban sa abag nilang Jun-Jun Eroles, King Celis, Bernard Arac ug Archie Ompad.

Puntos Matag Usa

YAN C RICO (92) - Macasero 18, Gomez 12, Ybañez 11, Velasquez 10, Lungay 9, Portugaliza 9, Ngujo 8, Aris 7, Alves 4, Godinez 4, Labadan 4

JOHN VIDEOKE (89) - Versoza 16, Cuadra 15, Llenes 10, Daluz 8, Tomaquin 8, E. Gomoz 7, Bagano 6, Fernandez 5, Patalinghug 5, Paradillo 5, R. Gomoz 4 – BANAT NEWS