Heartfelt nagmangtas sa FYA

CEBU, Philippines – Nagmangtas ang Heartfelt human mahiagom og tulo ka sunod-sunod nga kapildihan pinaagi sa paglubong sa Aqua Serv Purified Water, 105-75 aron magpabiling buhi alang sa semifinals sa F. Llamas Youth Association (FYA) 1st Vice Mayor Mike Rama Cup basketball tournament niadtong Domingo sa Vicente Sotto Memorial Gym sa barangay Punta Princesa, ning dakbayan.

Sa laing duwa, ang

team Jayra midaog batok

sa Grandeur sa iskor nga 92-82.

Unom ka players ang mipugnit og double figures alang sa Heartfelt sa pagpangulo nilang Almond Danding ug Tata Laborte nga mibugha og 22 ug 20 puntos matag usa.

Sila si Dodong Cabigas, Leonardo Rama, Takli Abella ug Alvin Basubas nagkumboya og 50 puntos alang sa Heartfelt nga nagbitbit na karon og 4-3 nga baraha.

Si Tito Bacarisas mitimba og 36 puntos alang sa Aqua Serv nga nadakin-as ngadto sa 4-4.

Sa laing bahin, si Bikeng Rollon mi-iskor og 19 puntos alang sa Jayra. Nakakuha sab kini og suporta gikan nilang Porky Pacaña ug Bern Ylanan nga nagkumboya og 30 puntos.

Si Dondon Cadungog milansang og 20 puntos

aron pangulohan ang Grandeur kinsa nagbitbit og 3-5 nga baraha. Si Mark Tundag midugang og 19 puntos ug si Jaime Atuel mitampo og 17 puntos.

Ang FYA gipaluyohan sab   ni Punta Princesa barangay captain Rolly Diorico, barangay councilor Ray Gabriel Salgado ug tournament director Boy Atillo.

Puntos Matag Usa

Unang duwa:

Heartfelt (105) - Danding 22, Laborte 20, Cabias 16, Rama 14, Abella 10, Basubas 10, Laborte 7, Arreglo 6
Aqua Serv (75) - Bacarisas 36, Villacastin 14, Navarro 12, Garcia 7. Fraklin 2, Sensontec 2, Avila 2

Ikaduhang duwa:

Jayra (92) - Rolon 19, Pacaña 16, Ylanan 14, Aglipa 10, Zapanta 8, Del Mar 8, Cajigas 6, Pasco 2

Grandeur (82) - Cadungog 20, Tundag 19, Atuel 17, Dacayana 12, Guy 8, Pacaña 4, Medalle 2 – BANAT NEWS