3rd leg sa PTT Lubricants race series plansado na

CEBU, Philippines – Nahikay na ang tanan alang sa 1st Mayor Jonas Cortes Underbone Rally Cross Racing 2009, nga magsilbeng 3rd leg sa PTT Lubricants race series karong Domingo diha sa specialized racetrack, duol sa Cebu Doctor's University (CDU) sa Mandaue reclamation area.

Ang lumba nga sugdan sa alas-8 sa buntag hangtod na sa alas-5 sa hapon, pormal nga gilusad kagahapon didto sa Family Choice Restaurant sa Gaisano Countrymall.

Mitambong sa press conference mao si PTT Lubricants retail operations manager Fidel Aloba, uban sa iyang assistant nga si Isidro Abella, PTT fuels and lubricants adviser Benjamin Solon, Evvolve Marketing Corp. marketing manager Kenneth Ang, account executive Dandy Tagalog ug race director Edsel Odulio sa Power Sports Racing (PRS) Promotions.

Kapin sa 50 riders gikan sa Cebu, Dipolog, Dumaguete ug Leyte ang gilaumang mosalmot ning usa ka adlaw nga lumba nga gipaluyohan sab sa Evvolve Marketing uban sa abag sa kagamhanan sa dakbayan sa Mandaue ubos sa liderato ni Mayor Jonas Cortes.

Mga kategoriya nga batukan mao ang premiere expert open, beginners ug novice 110cc ug 125cc.

Ang kampiyon sa expert division makadawat og P5,000, ang ikaduha mobulsa og P3,000 ug ang ikatulo makaangkon og P2,000.

Ang top three finishers sa novice class mobulsa og P3,000, P2,500 ug P2,000, samtang ang top three winners sa beginners brackets makaangkon og P2,500, P2,000 ug P1,500.

Ang fourth ug fifth placers sa tanang kategoriya makadawat og P500 matag usa.

Adunay special race alang sa mga banggiitang motocross riders dinhi sa Sugbu lakip na si MS Motosuit image model Jonjon Adlawan ug ang managsuong Jovanni ug Jubenile Abellar.

Ugma adunay pagahimuon nga practice runs aron ang mga partisipante makasinati sa binyu, samtang ang race proper himuon sa Domingo.

Ang registration fee nagkantidad og P200 libre na ang motor oil. Assorted freebies sama sa t-shirts, key chains ug stickers ang ihatag ngadto sa mga dumoduong. – BANAT NEWS