Sa Mayor Erwin Aguspino Moto-x Cup

CEBU, Philippines – Wala kapugngi si Jon-Jon Adlawan sa iyang paghari sa 2nd Mayor Erwin Aguspino Motocross Cup nga magsilbeng 7th leg sa 2009 MS Motosuit Motocross Series niadtong Domingo didto sa Ayungon, Negros Oriental.

Si Adlawan, ang MS Motosuit image model nakabentaha sa maong lumba tungod sa pagpalta ni Glenn Aguilar aron paglangkat sa titulo sa expert division ning maong lumba nga gipaluyohan sa Castrol Philippines.

Gipilde ni Adlawan sila si Ambo Yapparcon ug Irwin Ramas-Uypitching nga nahimutang sa ikaduha ug ikatulo nga dapit.

Wala sab hinuon magpabitin si Yapparcon dihang nidaog kini og titulo human gidominar ang intermediate class batok sa iyang maguwang nga si Weng ug ni Jubenile Abellar.

Laing MS Motosuit endorser nga si John Flores, midaog sab og titulo pinaagi sa pagpanghawod sa novice open production, samtang sila si Ryan Querol ug Donkey Sanchez mitapos sa ikaduha ug ikatulo nga dapit.

Hinuon, si Sanchez adunay ikapasigarbo dihang siya ang nidaog isip labing kusog sa beginners open production ug open enduro. Napugngan ni Bonnie Bustillo si Sanchez pagdaog sa ikatulong titulo pinaagi sa pagpukan niini sa local enduro. Ang reigning “Rider of the Year” nga si Seigfred Ornopia sa Keiz BJ Racing Team ug iyang mga anak midaog sab og korona human manghawod sa ilang tagsa-tagsa ka dibisyon.

Si Seigfred wala kapugngi sa iyang kamangtas aron pagdaog sa korona sa Executive-A. Si Seigfred gisundan ni Gener Sicad alang sa ikaduha ug ni Jun Enriquez, kinsa nalandig sa ikatulo. Ang kinamagulangang anak ni Seigfred nga si Earl Jean Brylle milangkat sa korona sa mini class human gipilde ang anak nga babaye ni Weng Yapparcon nga si Marianne. Laing duha ka anak ni Seigfred nga sila si Ken Keizer ug Kerry Keize miharos sa unang-duha ka dapit sa peewee division.

Si Enriquez misakmit sa korona sa Executive-B human gipilde si Gener Sicad ug Adonis Famador, kinsa ni-okupar sa ikaduha ug ikatulo nga dapit.

Sa iyang bahin si Butch Flores, mihakot og dobleng kadaugan pinaagi sa all-Negros enduro race ug sa Executive-C. Iyang gipukan sila si King Solomon Canoy ug Baddok Lopez. – BANAT NEWS