Matumla mo-KO ni Banal

CEBU, Philippines – Mibahad si kanhi International Boxing Organization (IBO) super flyweight ug World Boxing Association (WBA) Inter-continental champion Mbwana Matumla, kinsa naila sab nga “African Golden Boy’ nga iyang nak-awton si AJ ‘Bazooka’ Banal sa ilang binakbakay nga ulohan og “Pagsubok” karong Mayo 16 diha sa Cebu Coliseum.

Si Matumla nga niaway na og 22 ka higayon, 18 ka daog diin 10 sa iyang biktima pinaagi sa KOs, bag-o lang milangkat   sa International Circuit Boxing World bantamweight title pinaagi sa unanimous decision batok ni Francis Miyeyusho niadtong Enero 17.

Iya sab nga gipilde ang Pinoy’ng si Eric Barcelona aron pagdaog sa bakanteng IBO super flyweight crown didto sa South Africa.

Nakabiktima sab kini og laing Pinoy’ng boksidor nga si Joel Avila alang sa WBA Intercontinental jr. bantamweight title.

“I will come to Cebu to knock-out Banal. I am faster, stonger and more experienced. Our fight will be over in five rounds and I will be the last man standing,” matud pa sa 34-anyos nga si Matumla, kinsa nidaog sa WBA Pan-African superflyweight title batok ni South African Simon Ramon.

Apan nahanaw ang iyang mga kamot ang korona dihang gipaundang siya ni Silence Mabuza.

Si Banal ug ang stablemate nga si Czar Amonsot ug Jason Pagara mopakita sa ilang kaandam sa ipahigayong press preview karong Sabado sa alas-4 sa hapon diha sa SM Atrium.

Adunay libreng complimentary general admission tickets nga ihatag alang sa unang 50 ka tawo kinsa motan-aw sa workshop nga sugdan sa alas-4 sa hapon. – BANAT NEWS