2nd Int'l game fishing competition banatan ugma

CEBU, Philippines – Ang isla sa Siargao nga nabantog isip surfing capital sa Pilipinas mapasigarbuhon na usab nga mopahigayon sa 2nd International Game Fishing (Angling) Competition 2009 karong Mayo 7-9 didto sa Pilar, Surigao del Norte.

Mga local ug foreign anglers ang magbagat na usab sa ikaduhang higayon alang niining usa ka dakung international game fishing competition nga seguradong makapa-agni sa local anglers ug ingon man foreign anglers gikan sa Australia, Canada, Russia, Taiwan, Malaysia ug sa Estados Unidos.

Ang maong kompetisyon gisugdan niadtong miaging tuig pinaagi sa mga paningkamot ni Congressman Francisco Matugas sa unang distrito sa Surigao del Norte uban sa suporta   sa Department of Tourism ubos ni Secretary Joseph 'Ace' Durano ug sa lokal nga kagamhanan sa Pilar.

Si Matugas kinsa maoy amahan sa maong kompetisyon, nagkanayon nga ang international game fishing maoy mobutang sa Pilipinas sa mapa ilabi na ang Siargao tungod kay mahimo man silang naandan nga dapit alang sa major international game fishing nga mao unya'y makapalambo sa tourism industry alang sa usa ka world class surfing destination.
Si President Gloria Macapagal Arroyo maoy dinapit ug mamumulong. Gipaabot sab siya nga maoy mo-apod-apod sa mga ganting salapi ngadto sa mga mananaog sa lima ka mga kategoriya. Labing dakung biggest bill fish category nga may gibug-aton nga 15 ka kilo, labing dakung talakitok category nga nagtimbang og labing menos tulo ka kilo, labing dakung wahoot o “tanguigue nga may timbang lima ka kilo, labing dakung dorado nga may timbang lima ka kilo ug sa laing mga isda gawas sa iho, pagi, puffer fish, dolphin ug mga turtles.

Ang makakuha sa unang ganti sa labing dakung bill fish makadawat og P30,000, ang ikaduha makadawat og P20,000 ug ang ikatulo mobulsa og P10,000.
Ang ganti sa labing dakung talakitok, tanguigue ug dorado makadawat og P20,000 alang sa unang ganti, P10,000 alang sa ikaduhang ganti ug P5,000 alang sa ikatulong ganti. – BANAT NEWS