PC Nets molusad libreng basketball clinic

CEBU, Philippines – Ang Praise Cathedral-Now Evangelizing Through Sports (PC Nets) sa abag sa Cebu City Sports Commission molusad og libreng Evangelistic Basketball Clinic ugma gikan sa alas-7:30 hangtod sa alas-10 sa buntag diha sa Cebu City Sports Center basketball court.

Si head trainor ug Asian College of Technology (ACT) Cyber Knights coach Tata Merced nagkanayon nga ang maong clinic bukas alang sa tanang mahiligon og basketbol nga nagpangedaron og 15 anyos ug pataas.

Matud pa ni Merced, nga bisan pa og libre ang clinic ug pagahimuon lamang sa matag adlaw’ng Sabado, ang mga partisipante mobayad lang gihapon og P10 nga entrance sa CCSC gates.

Ang maong clinic gitugotan ni CCSC chairman Ricky Ballesteros.

Si Merced nagkanayon nga ang tumong ug katuyoan sa clinic mao ang paggiya sa mga batan-on aron sila mahilayo sa ginadiling drugas ug hinuon mahiduol sila sa pulong sa Diyos.
Matud pa ni Merced, ang nahisgutang clinic usa sab ka pamaagi alang sa usa ka community outreach ug character building alang ngadto sa mga kabatan-onan aron sila makabaton og mga birtud sama pananglit sa perseverance, hardwork ug discipline ug sa samang paagi, makadawat sila sa grasya sa Ginoo.

Sa laing bahin, si Merced mibutyag nga ang PC Nets basketball league gisugdan na didto sa Immanuel Bible College (IBC) gym sa Banawa.

Lima ka team nga nagrepresentar sa nagkalain-laing sectors ang mopakita’g aksiyon nga naglakip sa Serlord alang sa mga bana, Cruisers Jam alang sa youth, Cutting Edge alang sa mga businessmen ug ang Connect Groups Bible Studies nga gibahin ngadto sa Apple Tree ug Nature’s Spring, nga pulos nagrepresentar og bible studies. – BANAT NEWS