Queen Elizabeth

CEBU, Philippines – Sa nahauna niyang pamahayag, si Pinoy ring superstar Manny Pacquiao nagkanayon nga gawas sa iyang mga kababayan ug mga fans tibuok kalibutan, ihalad sab niya ang iyang away batok sa Briton nga si Ricky Hatton ngadto sa kamanghoran niyang anak nga si Queen Elizabeth. Sa susamang tono, ipahinungod sab ni Hatton ang maong away ngadto ni Queen Elizabeth, ang symbolic head of state sa England. Kun atong somadahon, ang tinamod nga Rayna sa Britanya maoy moguwang bulahan unsa man gani ang resulta sa bugno nilang Hatton ug Pacman.

* * *

Karon pang Domingo ang ilang bugno didto sa MGM Grand Hotel and Casino sa Las Vegas, apan aduna nay gikatakda nga laing engkuwentro tali nilang Pacquiao ug Hatton. Apan dili ibabaw sa ring, kondili sud sa beerhouse. Nabantog man gud kining manginumay si Hatton nga yano ra kaayong moyarok og beer nga kuwang na lang iyang ikaligo. Si Pacquiao dili sab mabang-bang kun tinagayay sa bulawanong likido ang hisgutan. Nindot seguro noh nga human sa ilang boksing, magtige sab sila padaghanay og matumba nga botelya, kinsa kaha ang ma-knockout?

* * *

Gibaha ko og pangutana sa akong mga higala ug kaila kun asa ko, kang Pacquiao o kang Hatton ba. Simple ra ang akong tubag, kun nagduha-duha ko sa tsansa ni Pacquiao nga modaog sa miagi niyang away ni Oscar de la Hoya, ning puntoha masaligon kaayo ko nga si Pacquiao maoy mohuyop sa torotot sa kadaugan.

Wala nako himoang basihan ang iyang kalampusan batok ni De la Hoya ha? Ato bayang nakita nga dili ang De la Hoya nga atong naila ug gi-idolo ang niaway niadtong higayona kondili usa ka Oscar nga nagmaskara og punching bag.

Tinuod nga mas daku, adunay kusog ug dekalibre og abilidad si Hatton. Apan ang akong sukaranan nganong nagtuo ko nga mahagba siya sa mga kamot ni Pacman mao nga haom kaayo ang iyang estilo sa inawayan ni Pacman. Si Hatton agresibo ug hilig modasdas sa iyang kontra. Ug kondili siya magmatngon, hayan nga siya malukapa sa ka-abtik ug kapaspas sa mga kumo ni Pacman.

Sa kinatibuk-an, nagtuo ko nga usa kini ka maanindot ug eksplosibong away tali sa duha ka banggiitang boksidor nga pulos adunay makabungog nga kusog. Di na lang ta maghisgut pa og stratehiya ug taktika kay sa mura'g bato nilang mga kinumo, aduna gyuy matikangkang nilang duha. Ug sa nasiplatan nako sa akong bolang kristal nga dili makita, si Hatton patikay-angon ni Pacman sa dili pa ang ikawalong hugna.

* * *

PERSONAL NOTES. Akong ipadangat ang mainiton nakong pahalipay ngadto ni Ian Caniga, ang pinangga nga liwat sa akong higala nga si Master Benigno 'Ekin' R. Caniga, Jr., nga maoy founder sa Yaw-Yan Cebu ArDigma. Si Ian magsaulog sa ika-18 nga sumad sa adlaw niyang natawhan karong adlawa. Ngadto sa wala masayod, si Ian usa sa mga junior instructors sa Yaw-Yan ArDigma. Ian, I wish you all the best life could offer. Stay safe and may God bless you always.

* * *

(Kun dunay mga pangutana o reaksiyon, mahimong mo-email sa [email protected])