Abellar, Ornopia, Sanchez midaog duha ka titulo sa 3rd MS Motosuit

CEBU, Philippines – Miposte og duha ka daog si Venil Abellar sa 5th leg sa Castrol-backed 3rd MS Motosuit Motocross Series nga giulohan og "Hon. Mayor Ricky Ramirez Motocross Challenge" niadtong Domingo didto sa Medellin sa amihanang bahin sa Sugbu.

Gidominar ni Abellar ang expert open pinaagi sa pagpilde ni Jon-Jon Adlawan, kinsa nahimutang sa ikaduhang dapit, samtang si Clark Wagas mipahiluna sa ikatulo.

Si Abellar naghari sab sa intermediate open alang sa iyang ikaduhang titulo, gisundan ni Paolo Inoc ug Wagas nga mi-okupar sa ikaduha ug ikatulo nga dapit.

Wala hinuon magpabitin si Adlawan, ang image model sa MS Motosuit human niya gidominar ang novice open production pinaagi sa pagpukan nilang Donkey Sanchez ug Seigfred Ornopia sa Keiz BJ Racing Team, kinsa mipuwesto sa ikaduha ug ikatulo.

Wala hinuon magmahay sila si Ornopia ug Sanchez kay mihipos kini'g duha ka titulo sa laing kategoriya.

Si Ornopia, ang manghod ni MS Motosuit big boss Lou Ornopia, maoy nidaog isip labing kusog nga rider sa beginners open human gipukan sila si Sanchez ug Aloy Igoy. Gidominar sab ni Ornopia ang Executive-A, gisundan nilang Gener Sicad ug Igot mi-okupar sa ikaduha ug ikatulong nga dapit.

Sa iyang bahin, si Sanchez, naghari sa open ug local enduro class. Sila si Boni Bustillo ug Banji Monilar mi-okupar sa ikaduha ug ikatulo nga dapit sa open enduro, samtang sila si Bustillo ug JC Obligado mao sab ang miangkon sa ikaduha ug ikatulo sa local enduro.

Si Sicad nakabitbit sab og titulo human maghari sa executive-B, gisundan nilang Igot ug Adonis Famadora.

Ang nag-unang tulo ka finishers sa executive-C mao sila si Titing Sicad, Renante Tigue ug Bong Baluyos.

Ang anak ni Seigfred nga si Earl Jean Brylle Ornopia midominar sa mini/peewee division human gipilde silang BJ Pepito ug Vinz Batulan.

Wala sab magpalupig si Kerry Ken Ornopia sa iyang dibisyon dihang iyang gidominar ang peewee event batok nilang Vinz Kenneth ug Kerry Keizer Ornopia. - Yoyo R. Abayan (BANAT NEWS)