Lopez mipahunong ni Peñalosa sa 9 rd.

CEBU, Philippines - Bisan pa og sakit sa iyang kabubut-on, wala magduha-duha si hall of famer trainer Freddie Roach sa pag-itsa sa puti nga tuwalya sa ikasiyam nga round timaan sa pagpahunong sa away tali sa beteranong si Gerry Peñalosa batok sa undefeated Puerto Rican champion Juan Manuel Lopez , kagahapon didto sa Coliseo Ruben Rodriguez Bayamon sa Puerto Rico.

Ang 36-anyos nga Peñalosa kinsa nakatagamtam sa labing una niyang pilde pinaagi sa TKO sulod sa 20 ka tuig niya sa pagpamuksing, wala makapiog sa kaagresibo ni Lopez .

“He (Lopez) is just too strong, overpowering,” matud pa ni Roach atol sa interview sa media paghuman sa away .”It pains me to stop the fight but I didn’t want him to absorb more damage”, dugang pa ni Roach.

Ang Puerto Rican knockout artist nibuhi og 1,020 ka mga kinumo diin 444 ang ni-igo ngadto ni Peñalosa, samtang si Peñalosa nilabay og 392 ka mga kinumo, diin 99 ang nisulod.

Apan bisan paman sa maong kapildehan, gisugat gihapon si Gerry og mga pagdayeg tungod sa maisugon niyang pag-atubang ni Lopez.

Si Roach wala usab magmahay sa gipakitang away ni Peñalosa ug ni-asuy siya nga gipakita ni Peñalosa ang iyang abilidad ug kapursigido nga modaug batok sa mas kusgan nga si Lopez.

Si Lopez kinsa nilampos pagdepensa sa WBO superbantamweight belt, nisaka karon sa record nga 25 ka daog diin 23 niini gikan sa knock-out.

Sa iyang bahin, si Peñalosa, kinsa napakyas pagsakmit sa ikatulo niyang division title human nakuha ang WBC/ WBF superflyweight crowns ug WBO bantam belt nikanaug ngadto sa record nga 54-7-0 36KOs.

Sa dihang gihinabi na siya sa media, mismo si Lopez nakadayeg sa gipakita ni Peñalosa batok kaniya, “He’s a great fighter, very strong even at his age”. - Lemuel P. Maglinte (BANAT NEWS)