Tahanlangit gilubong sa Parekoys, 88-40
CEBU, Philippines - Yano ra kaayong mikulit og daog ang Parekoys pinaagi sa paglubong sa Tahanlangit, 88-40 sa aspirant division sa Lourdes Parish Summer Saya Basketball League didto sa Punta Princesa Sports Complex, ning siyudad.
Sila si Micmic Oberes ug Keven Eslabon nagkumboya og 15 puntos sa ikaduhang kuwarter alang sa ilang 13 puntos nga labaw, 24-11 sa halftime.
Ang Parekoys mipasud og 21 sa 23 niini ka itsa sa third quarter aron inaton og maayo ang ilang labaw.
Tungod sa kalawom sa lubong, ang Parekoys nakapanimaho na sa ilang sayo nga kadaugan.
Si Mark Gabiana maoy topscorer sa Parekoys sa iyang 16 puntos, gisundan nilang Dencio Uy ug Oberes nga mitampo og 13 puntos matag usa.
Ang Tahanlangit gipangulohan ni Jenny Sobrevilla, kinsa miposte og 12 puntos, si Jovanne Deramas mitampo og 10 puntos ug si Valerie Sacedon miamot og sayes puntos.
Sa midget division, si Ferdinand Son mibahog og 11 puntos aron pangulohan ang KGB paglubong sa Zypherin sa iskor nga 40-27.
Puntos Matag Usa
Parekoys (88) - M.Gabiana 16, D. Uy 13, M. Oberes 13, K. Eslabon 8, R.Maratas 6, I.Amohalla 2
Tahanlangit (40) - J.Sobrevilla 12, J. Deramas 10, V. Sacedon 6, A.Dayanan 4, J.Deramas 4, C. Pugosa 1. - Lemuel P. Maglinte (BANAT NEWS)
- Latest
- Trending
