Binukbukay na karon sa Cebu Coliseum

CEBU, Philippines – Mahitabo na sab ang laing eksplosibong aksiyon diha sa Cebu Coliseum sa dihang si Rolando ‘Smooth Operator’ Magbanua sa Braveheart Boxing Gym sa North Cotabato ug ang Sugbuanong si Bert ‘Ninja’ Batawang modepensa sa ilang tagsa-tagsa ka korona sa “Thriller in April” card karong gabii.

Sugdan ang away sa alas 6:00 sa gabii.

Ang walay pildeng si Magbanua manalipod sa iyang World Boxing Organization (WBO) Interim bantamweight Oriental title batok ni Wan Sithsaithong sa Thailand, kinsa mao karon ang labing sikat sa Kokiet Boxing Gym sa Bangkok, samtang ang 36-anyos nga si Batawang modepensa sab sa iyang WBO Oriental light flyweight title batok sa 23-anyos nga si Edrin ‘The Sting’ Dapudong.

Ang 23-anyos nga si Magbanua,milangkat sa bakanteng WBO title human iyang gipaundang sa ikaunom nga hugna ang Mehikanong si Jose Angel Cota sa iyang unang away sa Cebu Coliseum niadtong Pebrero 21.

Paninguhaon ni Magbanua nga iyang mapukan ang Thai challenger aron mosaka ang iyang world ranking ug mapalapdan ang iyang posisyon alang sa kampanya sa WBO bantamweight crown nga gihuptan karon ni Gerry Peñalosa. Sa kasamtangan,

si Magbanua anaa sa ika-15 sa WBO.

Sa iyang bahin, si Batawang, seguradong nag-atubang karon og malisod nga tahas batok ni Dapudong, ang   pambato sa Braveheart Boxing Club nga gipanag-iya sa managsuong Pinol sa North Cotabato. Si Dapudong naghupot karon og 18 ka daog, duha ka pilde uban ang 12KOs.

Gawas niini, kinahanglan sab nga modaog si Batawang, kay kun mapilde mao kini ang makabugto sa nagkutay niyang career. Si Batawang adunay 34 ka daog uban ang unom ka pilde.

Lain pang moaway, si undefeated Korean prospect Jong Hwa Lee (8-0-1KO) moharong batok ni Richard ‘Lion Heart’ Betos sa Mindanao sa ilang walo ka hugna nga kumbati.

Mopakita sab og aksiyon si undefeated Lorenzo ‘Thunderbolt’ Villanueva (13 wins, 13 KOs) ug Rommel ‘Little Assassin’ Asenjo (12 wins, 2 loss, 10 KOs), nga pulos makigharong sa mga Thai boxers. – BANAT NEWS