Cebu Niños nakatabla sa series, 1-1

CEBU, Philippines - Mibawos ang defending national champion M. Lhuillier Kwarta Padala-Cebu Niños human masugamak sa una nilang duwa dihang ilang gipilde ang top seed Misamis Oriental Meteors sa Game-2 sa iskor 58-55 aron pagtabla sa “best-of-five” final series nga 1-1 sa 2009 Smart Liga Pilipinas Conference II niadtong Miyerkules sa gabii didto sa Xavier University Gym sa Cagayan de Oro City.

Gumikan sa maong kadaugan, ang Cebu Niños ni businessman-sportsman Michel Lhuillier ug coach Raul ‘Yayoy’ Alcoseba nakakuha og homecourt advantage ug miinat sa serye ngadto sa Game-4 nga gikatakda ugma diha sa University of San Carlos (USC)-main gym.

Kun adunay Game-5 tiwason kini karong Domingo diha gihapon sa USC gym.

Ang USC gym maoy dapit diin ang Meteors naka-eskapo gikan sa mga kamot sa Cebu Niños, 69-68 aron angkonon ang Cebu City Leg title atol sa Tour Phase niadtong Marso 7.

Si Bruce Dacia mitusak og triple aron hatagan ang Cebu Niños og 14 puntos nga labaw, 54-40 sa oras nga 7:15 sa final quarter. Apan hinay-hinay nga mihubas ang maong labaw dihang ang Meteors ni Gov. Oscar Moreno ug coach Jun Noel mibatil og 12-0 run sa nahabiling 1:50 sa duwa sa iskor nga 52-54. 

Ang free throws ug ang walay puas nga depensa maoy gihimong hinagiban sa Cebu Niños pagpulpog sa Meteors.

Ang free throw ni Dacia sa nahabiling 14 segundos sa duwa maoy mikandado sa ilang kadaugan. Apan si Jercules Tangkay maoy topscorer alang sa Cebu Niños pinaagi sa iyang 16 puntos, gisundan ni Dacia nga adunay 13 puntos, samtang si Marlon Basco miabuno og 12 puntos.

Bugtong si Mark Yee ang mikulit og double figures alang sa pilderong Meteors pinaagi sa iyang 15 puntos.

Puntos Matag Usa

CEBU (58) - Tangkay 16, Dacia 13, Basco 12, Ababon 5, Enriquez 4, Mepana 4, Padilla 2, Santos 2

MISAMIS ORIENTAL (55) - Yee 15, Mente 9, Butel 8, Micutuan 8, Kong 5, Daja 4, Moreno 2, Gudez 2, Bombeo 2. – BANAT NEWS