Cue ball control

Sa pagdula og billiard, importante kaayo alang sa usa ka magdudula ang pagbaton og igong kahibalo sa pagkontrol sa bolamano. Kun menos siya'g katakus niining maong aspeto sa dula, posibleng dili epektibo ang iyang preparasyon.

Ang respetadong sports person nga si Ashok Kumar nagkanayon: "Striking the cue ball exactly right is what billiards is all about."

Ang pag-igo sa bolamano sa tukmang ig-anan maoy paagi sa pagkontrolar niini. Kun dili maigo ang bolamano sa tukmang ig-anan niini, maglisud ang magdudula sa pagkontrolar sa dagan niini ibabaw sa billiard table. Niini, dili makakita'g maayong opening ang preparasyon sa magdudula.

Importante kaayo sa dula ang pagkontrolar sa bolamano. Ang bolamano man gud maoy bugtong kontak sa magdudula nga naggunit sa tako ngadto sa object ball. Kun makontrolar sa magdudula ang bolamano, motabang kini paghatag kaniya og daghang opening alang sa umaabot niyang mga tayada aron makakamada siya'g score.

Busa kinahanglang madiktahan sa magdudula ang bolamano. Kini lang ang bugtong paagi nga mahimong epektibo ang performance sa usa ka bilyarista. Makita sa magdudula ang daghang kahigayonan sa pagdaog pinaagi sa cue ball control.

Aron makontrol sa magdudula ang bolamano, kinahanglang kontrolahon niya ang kusog nga iyang i-apply ngadto niini. Depende sa ipahigayon nga tayada, kinahanglang dili niya pasobrahan ang kusog nga iyang i-apply ngadto sa tako aron makontrolar niya ang dagan sa bolamano. Kun makontrolar niya ang dagan sa bolamano, seguradong adto kini mohunong sa dapit sa lamesa diin adunay opening alang sa lain na usab nga tayada.

Kini ang angay paninguhaon sa magdudula. Kun may igo siyang katakus bahin ini, daku'g garantiya nga maiya ang kadaugan.

* * *

(Mga sugyot ug pakisayod? Text sa 0910-8105522). - BANAT NEWS