Cebu mo-host sa 13th Nestea Fit Beach Volley Visayas elimination

CEBU, Philippines - Sa labing unang higayon, ang dakbayan sa Sugbu mo-host sa Visayas eliminations sa 13th Nestea Fit Beach Volley karong Abril 16-18 diha sa Parkmall beach sand courts sa Mandaue reclamation area.

Mga beterano, bag-ong tubo ug bag-ong paresan dinhi sa Sugbu ang mopakita’g aksiyon ning tulo ka adlaw nga kompetisyon.

Sa miaging tuig nga national finals, sila si Janelle Tabio ug Florian Gutierrez sa Southwestern University (SWU) mipamatuod nga dominante ang Sugbu pinaagi sa pag-angkon sa kampiyonato.

Sa wala pa kini mahitabo, sila si Jusabelle Brillo ug Janez Armie Igot sa University of the Visayas (UV) naghari ning labing prestihiyusong beach volley event dinhi sa   nasud.

Ning higayona mausab ang dagway sa duwa gumikan kay ang SWU moparada man og bag-ong players nga sila si Danika Gendrauli ug Lorie May Layno, samtang ang UV mokuha sa serbisyo nilang Ivy Mae Abella ug Noriena Castro.

Sa laing bahin, ang University of Southern Philippines Foundation (USPF) nagsalig ni Ericka Camille Verano uban sa iyang bag-ong pares nga si Apple Seraum. Ang University of San Carlos (USC) magsalig sab sa abilidad nilang Jerymie Montalvo ug Chona Gesulga.

Ang lig-ong title contender University of San Jose-Recoletos (USJ-R) ni Cebu Sports Hall of Famer coach Grace Antigua moparada sa mga kanhi sakop sa RP Youth nga sila si Genie Sabas ug Michelle Simbajon, kinsa wala makapakita’g aksiyon sa miaging tuig tungod sa kakulian sa iskedyul sa National PRISAA.

Sa men’s division, ang UV ni coach Raffy Briones moparada nilang Jade Becaldo ug Jay-R Bendejo, ang USPF mikuha sa serbisyo nilang Edward Ybañez ug Marlon Luces, kinsa niduwa kaniadto uban sa St. La Salles (USLS)-Bacolod.

Ang USJ-R mangindahay na sab sa ilang maayong kapalaran pinaagi sa pagpabilin sa lig-ong tandem nilang Ariel Carumba ug Louijie Tigpos.

Ang USC ni coach Eugene dela Cerna, nga napakyas sab pag-apil sa miaging tuig tungod sa National PRISAA didto sa Zamboanga moparada gihapon ni Roderick Arenasa, kinsa timbangan sa iyang bag-ong pares nga si Bonvie Estrera.

Ang nag-unang tulo ka teams sa matag dibisyon moabante ngadto sa national finals karong Mayo 6-9 didto sa Boracay Island. – BANAT NEWS