Moya mipukan ni Acuna sa ABAP boxing tourney

CEBU, Philippines - Giladlad ni Margarito Moya sa Team Cebu ang tanan niyang abilidad aron buntogon si Jade Acuna sa Bacolod City sa elimination round sa 1st Smart/ABAP Area Boxing Tournament niadtong miaging adlaw didto sa Kananga Municipal Gym.

Si Moya wala mohatag og higayon ni Acuna nga makabawos sa ilang tulo ka hugna nga kumbati aron pagkulit og impresibong kadaugan sa 31 kg. division.

Lain pang mga boksidor nga nidaog sa 11-12 years old category mao si Ryan James Flores sa Bago City dihang iyang gipilde ang pambato sa Bacolod City nga si Jeory Amante pinaagi sa desisyon, 17-6 aron moabante sa sunod nga round sa 29 kgs. Si Melmark Dignos sa Cebu City ug Raymary Pangkarutan sa Bago City mi-abante sab sa sunod nga round sa 28 kgs. class dihang ilang gipilde sila si Gerald Pangkarutan ug Danny Quiñalona.

Sila si Ardie Boyose ug Adriano Pescante sa Cebu City nangapukan sa ilang tagsa-tagsa ka kaatbang.

Si Boyose napilde ni Juren Labordo sa Bacolod City, 20-7, samtang si Pescante gipaundang sa unang hugna ni Jhonrile Maugro sa junior boys division.

Hinuon, si Pescante nakabawi dihang iyang gipilde si Junrey Redondo sa Ormoc City pinaagi sa referees decision.

Gipaundang sab ni Martin Cordova sa Bago City sa oras nga 1:49 sa unang hugna ang kaatbang niining si Martin Pepito sa Ormoc City sa 45kgs division.

 Si Timoteo Altubar sa Cebu City nikulit sab og daog batok ni Leoni Bordeos sa Northern Samar.

Ang 1st Smart/ABAP Area Boxing Tournament gipasiugdahan sa Amateur Boxing Association of the Philippines (ABAP) nga gipangulohan ni chairman Manny V. Pangilinan ug presidente niining si Ricky Vargas. – BANAT NEWS