Gorres mipahunong ni Leyva

CEBU, Philippines - Usa ka mensahe ang gipadangat ni ALA Boxing Gym star Z “The Dream” Gorres sa kalibutan sa boxing nga may katakus usab siya nga mukulit og usa ka knock-out dihang iyang gipahunong ang kanhi Mexican world champion Roberto Carlos “Mako” Leyva sa seventh round aron masakmit ang WBO Oriental 118-pound belt sa main event sa “Judgement at the Waterfront” niadtong miaging gabii didto sa Pacific grand ballroom sa Waterfront-Cebu City Hotel.

Wala usab pakyasa ni Milan Melindo ang mga Sugbuanon dihang mipatigbabaw siya batok sa ex-IBF minimumweight champion Muhammad Rachman sa Indonesia sa kaugalingon nilang 10-round bout sa supporting main event.

Human sa nindot nilang gipakita sa tagsa-tagsa nila ka away, napamatud-an nila ni Gorres ug Melindo nga usa sila sa mga mamahimong world champion sa umaabot nga panahon.

Ang 26-anyos nga si Gorres mipa-igo sa nagpungasi niya nga mga kinumo ngadto sa lawas ni Leyva sa pagbagting sa opening bell. Atol sa round four, usa ka kusog nga tira ang miigo sa lawas sa Mehikano nga miresulta sa pagkabarag niini apan naluwas kini sa pagbagting sa bell.

Giusban ni Gorres si Leyva sa round five ug six ug mga nindot nga kombinasyon uban ang mga mahait nga uppercuts, wala na makalahutay pa si Leyva sa seventh round dihang gikastigo siya ni Gorres ug napugos ang iyang trainer nga si Raul Lopez sa pag-itsa sa tualya timaan nga mi-surender na kini.

Tungod sa maong kadaugan, si Gorres misaka ngadto sa 29-2-2, 16 KOs nga record, samtang si Leyva natagak ngadto sa 25-9-1, 20 KOs nga record.

Sa iyang bahin, si ALA Promotions president Michael P. Aldeguer kinsa nagmaya sa nindot nga gipakita ni Gorres, nagkanayon nga dako pa ang angay trabahuon sa taga-Mandaue City sa dili pa niya kini i-away alang sa usa ka world title.

Sa laing bahin, bisan paman og naglisud siya pagdespatsa sa beteranong si Rachman, gipakita gihapon sa taga-Cagayan de Oro nga si Melindo ang iyang katakus dihang nikulit siya og 97-93, 98-92, 96-94 sa scorecard.

Ang 21-anyos nga si Melindo, nipalambo sa iyang record ngadto sa 18-0, 5KOs, samtang si Rachman nasugamak ngadto sa 62-7-5, 31KOs

Sa supporting bouts, gipilde ni Michael “Sunday Punch” Domingo si Monico Laurente sa usa ka unanimous decision, samtang nakabawus na usab si James batok ni William Jorge pinaagi usab sa unanimous decision.

Si Marjohn Makahilig nipahunong ni Marlon Ariesga sa first round, ug Jomar Cordinillo maoy mipatigbabaw sa ilang away ni Ricky Nuñez pinaagi sa usa ka majority decision. - Lemuel P. Maglinte (BANAT NEWS)