CSD sugod na ilang kampanya sa 1st MLKP Cup

MGA DUWA KARON(USC Gym)

2:00 pm -- Opening Ceremony

2:30 pm -- CSD Power Brokers vs. Adis Sportswear

4:00 pm -- Binglens vs. Ave Maria

CEBU, Philippines - Pormal na nga buksan ang 1st M. Lhuillier Kwarta Padala Cup basketball tournament uban ang duwa karong hapon diha sa University of San Carlos (USC)-main gym.

AngCSD Power Brokers moharong sa Adis Sportswear gikan sa Lapu-Lapu City, samtang ang Ave Maria Sanctuary Park nga gilangkuban sa mga magduduwa sa USJ-R Jaguars makigsangka batok sa Binglens.

Karong adlawa mao sab ang pagtimaan sa pagbalik og coach ni Romy Cal alang sa Power Brokers. Nailado si Cal human midaog ang iyang team Cebu Institute of Technology (CIT) Wildkittens nga kanhi gipangulohan ni ex-pro Gilbert Demape. Gipukan sa CIT Wildkittens ang University of the Visayas (UV) Baby Lancers aron pagdaog sa korona sa Zonal elimination sa ulahing bahin sa 1990s.

Sila sab ang mi-representar sa Cebu alang sa National Inter-Secondary Basketball Championships didto sa San Pedro, Laguna diin nakuha nila ang ikaduhang dapit human sila mapilde ngadto sa University of Manila (UM) Hawklets.

Ang CSD gilangkuban sa mga magduduwa sa Carmen Copper Corporation (CCC) gikan sa Lutopan, Toledo City. Mikuha sab sila sa serbisyo nilang Michael Sereño, Danny de los Santos, Franklin Nailon, Anjo Nicanor, Sherwin Abobo ug Alaric Nazareno aron pagpalig-on sa ilang kampanya.

Mikompleto sa line-up sa CSD mao sila si Jerry Jaca, Aldrin Ocañada, Raul Redulosa, Wilbert Sayson, Jared Ken Abatayo, Jan Montalbo, Roy Arnado ug Francis Mangyao.

Ang head coach mao si Romy Cal, ang coach mao si Engr. Boboy Cal, assistant coach Patricio Rizal, team manager Naga City councilor Vince del Mar ug ang ilang team consultant mao si Mike Sususco. - – BANAT NEWS