Wade mi-iskor og 46 puntos,Heat midaug

CEBU, Philippines - Usa ka adlaw human siya did-i nga dili na pagamiton og band-aid sa iyang wala nga aping nga may markang “Flash” diin napilde sila sa Atlanta Hawks, 83-91-83, pungtanon nga misumbalik si Dwyane Wade apan ang New York Knicks maoy nabiktima sa iyang kalagot dihang naka-ipsot ang Heat sa iskor, 120-115 nga kagahapon sa nagpadayong aksiyon sa National Basketball Association (NBA) didto sa American Airlines Arena sa Miami, Florida.

Si Wade, ang leading scorer sa NBA, unang migamit og band-aid aron takpan ang iyang samad ubos sa wala niyang mata ug pipila niana ka adlaw atol na sa NBA All-Star Weekend, si Wade migamit sa maong band-aid nga mitawag kaniya’g “Flash” .

Si Wade mi-iskor og 46 puntos alang sa maong kadaugan ug iyang gitabla ang franchise record nga 24 puntos sa fourth period. Diriyot sab siya makakulit og triple double dihang mihimo siya’g 10 ka assists ug walo ka rebounds.

Ang Heat nabiyaan, 88-103 sa fourth period ug nagkadugo pa gyud ang ngabil ni Wade nga nagkinahanglan og tulo ka tahi. Ang coach sa Miami nga si Erik Spoelstra nakadawat sab og technical foul human siya moreklamo nganong wala tawagi og foul ang naka-igo ni Wade.

Si Nate Robinson kinsa gikan sa bench, maoy nangu sa Knicks sa iyang 29 puntos.

Sa laing bahin, midaug ang Orlando Magic batok sa Philadelphia Sixers diin naka-iskor na sila og 3-0 sweep human sa 106-100 nga kadaugan.

Sila si Rashard Lewis ug Hedo Turkoglu parehong may 23 puntos alang sa Magic ug si Andre Miller maoy nangu sa Sixers sa iya sab nga 23 puntos.

Naputol ang pito ka sagunson nga pilde sa Oklahoma City Thunder human ilang gipukan ang Memphis Grizzlies, 99-92, gisungay sa Chicago Bulls ang Houston Rockets, 105-102, midaug ang Milwaukee Bucks batok sa Washington Wizards, 109-93, midaug ang Utah Jazz batok sa Sacramento Kings samtang padayon pang nagduwa ang Los Angeles Clippers batok sa Charlotte Bobcats diin naglabaw ang Clippers sa halftime, 51-45.  - Gabby G. Malagar (BANAT NEWS)