CDO/USPF makigpinaksitay sa Virginia Corned Beef/CDU sa Partner's Cup

CEBU, Philippines - Paningkamotan sa CDO Idol Cheese Hotdog/University of Southern Philippines Foundation (USPF) nga dili mabulingan ang ilang rekord sa pagpadayon sa Cebu Schools Athletic Foundation, Inc. (CESAFI) Partner's Cup women's volleyball tournament karong adlawa diha sa USC gym.

Lab-as pa gikan sa ilang kadaugan sa PRISAA didto sa Dumaguete City, ang mga batos ni coach Jordan Paca moharong sa Virginia Premium Corned Beef/Cebu Doctor's University (CDU).

Sa pagka karon, ang USPF nagbitbit og 3-0 nga baraha.

Laing title contender, ang R. Lapid's Chicharon/Southwestern University (SWU), kinsa nagtangag sab og 3-0 nga baraha moharong sa Metro Gaisano/University of the Visayas (UV) alang sa pasiunang duwa.

Sa ikaduhang duwa, ang Ave Maria Sanctuary and Park/University of San Jose-Recoletos (USJ-R) makigsangka batok sa Enervon-C Multi Vitamins/University of Cebu

(UC).

Mga duwa sa hapon, ang USPF makigtige sa UV, ang USJ-R mobatok sa USC ug ang UC moharong sa CDU. – BANAT NEWS