TACABA Boys milatigo sa Batang 'Lacion sa boxing showdown

CEBU, Philippines - Ang mga masaarong boksidor sa Talisay City mipatigbabaw pinaagi sa pagbuntog sa ilang mga karibal gikan sa Consolacion atol sa amateur boxing encounter nga giuloha'g "TACABA Boys versus Batang 'Lacion" didto sa barangay Dumlog, Talisay City.

Ang pagpahigayon sa maong kalihukan kabahin sa grassroots sports development program sa Talisay City Amateur Boxing Association (TACABA) ubos sa liderato ni Resty Seville.

Ubang mga opisyal sa TACABA naglakip nilang international boxing referee/judge Teddy Alivio, Edwin Enerlan, Val Ylanan ug Dumlog Brgy. Capt. Charles Basillote, kinsa usa sa nipasiugda ning maong kalihukan uban sa Abejo Builders pinaagi ni Borgy Abejo.

Sa 19 ka away nga milungtad og duha ka oras, ang Talisay mikuha og 13 ka daog batok sa bisitang Consolacion nga nibitbit lamang og unom ka daog.

Sila si Sori Canonigo ug Delmar Cabatas maoy nangulo sa kadaugan sa Talisay. Si Canonigo miposte og 2-1 nga kadaugan batok ni Jocel Gestopa ubos sa 53 kgs. division, samtang si Cabatas mi-iskor og 3-0 nga kadaugan batok ni Jovan Muños sa 48 kgs. category.

Mirehistro sab og daog si Christian Silva batok ni Jay-R Molinda pinaagi sa referee stopped contest-outclassed (RSC-O).

Ang Talisaynons milansang og laing tulo ka daog pinaagi sa pag-iskor og 3-0 kortesiya nilang Marco Pumar, Kicheron Garces ug Cede Noblefranca batok nilang Alvin Alforo, Clent Gersale ug Vincent Sacor.

Napugngan ni Jorge Adusma sa Consolacion ang pagratsada sa Talisay pinaagi sa pagposte og 3-0 nga kadaugan batok ni Noligen Yray.

Ang Talisay subling miharos sa sunod nga upat ka away. Si Brian Abaquita ug Jerson Denoy parehong miposte og 3-0 nga daog batok nila ni Clent Monterola ug Gerald Alivio, si Steven Noblefranca miposte og 2-1 nga daog batok ni Manuel Camoro, samtang si Bob Anthony Bacus mipaundang sa ikaduhang hugna ni Joseph de la Peña.

Ang Consolacion warriors mipakita'g kaisog sa ilang pagpanulong ug mikulit kini'g upat ka daog. Sila si Elmar Pulvera ug Roldan Berezo nidaog pinaagi sa pagpa-undang nilang Jerymar Panilag ug Marco Apollo Pacaña, samtang sila si Clent Taotowan ug Jaylord Bangis, milansang og managsamang 3-0 nga kadaugan dihang ilang gilatigo silang Joseph Bacayan ug Romel Flores.

Mao kadto ang maayong bunga nga nakab-ot sa Consolacion kay gidaog sa Talisay ang katapusang upat ka away kortesiya nilang Reynante Noblefranca, Memar Dula, Delmar Cabatas ug Sori Canonigo.

Si Noblefranca mipukan ni Wendin Berao, samtang si Dula mimakmak ni Winston Manulat, 3-0.

Si Alvin Camoro maoy mihatag sa ikaunom nga daog alang sa Consolacion pinaagi sa pagpa-undang ni Noel Yanong.

Ang malampusong boxing showdown gipaluyohan sab sa mga sakop sa Dumlog Barangay Council nga sila si Nelson Abellana, Jun Guba, Bob Canizares, Hob de la Cuesta, Mitcher Belleza, Anthony Villaver, Gerry Empaces ug SK chairman Hughes Yagaya. (BANAT NEWS)