Prime Asia/UV naka-eskapo sa overtime

CEBU, Philippines – Krusyal nga three-point nga gilubong ni Harold Cincoflores sa katapusang 3.3 segundos maoy nakasalbar sa Prime Asia/UV Lancers batok sa Aerosol/USC Warriors sa overtime, 81-75 sa Cebu Schools Athletic Foundation, Inc. (CESAFI) Partner’s Cup niadtong Domingo sa gabii didto sa Cebu Coliseum.

MGA DUWA KARONG HUWEBES

(Cebu Coliseum)

5:00 pm

Virginia/CIT vs. R. Lapid’s/DBTC

6:30 pm

Enervon/UC vs. Aerosol/USC

Sa sayo pa, ang Hotel Fortuna/SWU Cobras mipakgang sa fourth quarter rally nga gihimo sa Ave Maria/USJ-R Jaguars aron sa pagposte og 77-70 nga kadaugan ug nagpabiling walay pilde sa ilang lima ka duwa.

Ang three-pointer ni Cincoflores maoy nagtabla sa iskor, 72-all sa nahabiling 3.3 segundos human mabuhi-i ni Michael Cantonao ang bola gikan sa inbound play ni Paul Norman Joven dayong kapupos sa oras.

Naglawig na unta sa kadaugan ang Warriors nga dili na kinahanglan pang moagi og overtime tungod kay naglabaw man sila og tres puntos, 72-69 sa katapusang 18 segundos ug angay na lang iselyado ni Giovanni Padillo ang duwa sa duha niya ka free throws. Apan pulos mikagar ang mahinungdanon niyang duha ka free throws sa nahabiling 16.9 segundos.

Anugon kaayo ang sipyat ni Padillo kay sa sayo pa, nakapasulod man siya og usa ka three-point shot nga naghatag sa Warriors og siyete puntos nga labaw, 72-65 sa nahabiling 1:26 sa fourth period. 

Dihang mosuway unta kini’g ratsada, ang Lancers mipabuhagay og 7-0 run lakip ang three-pointer ni Cincoflores aron ilogon ang momentum.

Si Cincoflores maoy nangu sa Lancers sa iyang 17 puntos, si Ritchum Dennison midugang og 16 puntos.

Wala na usab makaduwa ang 6-foot-11 nga si Gregory Slaughter kinsa atua karon sa Manila alang sa RP Team training pool.

Sila si Edrian Lao ug Bonifer Sendrijas pulos mirehistro og 14 puntos alang sa Lancers, kinsa nagbitbit karon og 3-2 nga baraha.

Si Padayao kinsa miposa og unom ka triples, maoy nangu sa Warriors sa iyang 20 puntos, si Cantonao miamot og 11 puntos ug si Joven mitampo og 10 puntos.

Sa sayo pa, ang Cobras (5-0) gipangulohan sa ilang rookie nga si Jefferson Pria, kinsa mi-iskor og 13 puntos, samtang ang Jaguars (1-4) gipangulohan ni Anecito Lapiz, Jr. kinsa mi-iskor sab og 13 puntos.

PUNTOS MATAG USA

Unang duwa:

Hotel Fortuna/SWU (77) - Pria 13, Zanoria 12, Belande 11, Nuñez 10, Diango 6, Pacquiao 6, Litorja 5, Gianchan 5, Divinagracia 3, Gallarde 2, Armecin 2, Poligrates 2

Ave Maria/USJR (70) - Lapiz 13, Ponce 12, Malinao 11, Amores 8, Llera 8, Delifno 5, Abing 4, Duran 3, Alquizola 2, Pateño 2

Ikaduhang duwa:

Prime Asia/UV (81) - Cincoflores 17, Dennison 16, Lao 14, Sendrijas 14, Mercader 9, Olivares 8, Manigque 3, Benedicto 2

Aerosol/USC (75) - Padayao 20, Cantonao 11, Joven 10, Gallarde 9, Padillo 8, Cortes 8, Panerio 3, Blanes 2, Bautista 2, Codilla 2   -BANAT NEWS