Manny batok Manny

Matag higayon nga mobisita ang akong sangay nga si Manny Pacquiao dinhi sa Sugbu, walay higayon nga dili siya manghagad og duwa'g basketbol. Tuod man kaadlawong daku kagahapon, nanawag si Pacman nako, pinaagi sa telepono sa akong higala nga si Jingjing Rama, sa katuyoan nga ako nang gipangagpas daan.

"Ngay magduwa ta'g basketbol," matud pa ni Pacman. Sama sa miagi namong mga duwa, midangop dayon ko sa suod nakong higala nga si Archt. Alan G. Choachuy aron pagpatabang sa pagpangita og binyu. Ug tuod man, wala ko pakyasa ni Sir Alan kay nakasigpat siya og bakanting oras nga alas-4 hangtod sa alas-6 sa gabii sa Benedicto College Gym sa may dalan A.S. Fortuna sa dakbayan sa Mandaue.

Sa dihang gitawgan na nako ang akong kontak sa kampo ni Pacman aron pagkompirma sa among duwa, wala ko makadawat og tubag. Mao tong nagdahum ko nga dili tingali madayon si Pacman ug dayong tawag ni Sir Alan nga ikanselar na lang ang among duwa.

Sa dihang mopauli na lang unta ko mga alas-4:30 sa hapon, nakadawat ko'g tawag gikan ni Jojo Sta. Teresa, usa sa mga close-in security ni Pacman ug nangita nga asa nako kay nag-ilis na sa iyang uniporme si Pacman.

Niadtong tungora nahingangha ko kay apeke na kaayo sa oras ug wala ko makadala og uniporme ug sapatos. Labaw sa tanan, mura'g lisud na kaayo tigumon ang among kauban gikan sa United Architects Basketball Club (UABC) kay na-ingnan na man silang Sir Alan nga dili mahinayon ang duwa.

Apan wala ko makabsi og paglaum bisan og apeke na kaayo ang oras. Usa gud ka talagsaong oportunidad ang makauban si Pacman ilabi na nga makaduwa siya nato og basketbol. Sa dihang gipahibawo nako si Sir Alan nga madayon ang duwa, mismo siya na-surprisa. Niadtong higayona, gidali-dali niyang gipangtawgan ang among kauban nga moadto sa Benedicto College Gym. Maayo na lang gani kay positibo tanan ang reaksiyon ug nahinayon ang tanan segun sa plano.

Pag-abot namo sa gym, nakabagat na sab mi'g problema kay hapit na mahuman ang among reservation, wala pa maabot si Pacman. Ang gihatag namong tagal alas 6:30 sa gabii kay adunay laing mogamit sa binyu ang grupo sa Club Monday.

Sa dihang hapit na mapupos ang among oras mao say pag-abot ni Pacquiao ug mga kaubanan. Mao nga sa way langan-langan among gisugdan ang duwa. Gumikan kay upat man ka kuwarter ang among duwa, nakakawat gyud mi'g oras nga gigahin unta alang sa Club Monday.

Apan maayo na lang gani kay masinabtanon kaayo ang mga higala namo sa Club Monday. Agi na sab seguro og pagtamod sa gi-idolo natong boxing superstar, ilang gihatagan og igong panahon si Pacman aron malingaw og duwa.

Gidugokan si Pacman sa mga estudyante sa maong kolehiyo nga puwerti ang suliyaw sa higayon nga mokupot na siya sa bola. Bisan og siya masipyat sa iyang itsa, pakpak ug mainiton nga abiba maoy madawat ni Pacman.

Wala niya pakyasa ang iyang mga fans kay game kaayo si Pacman ug ang iyang asawa nga nakigposing ug namirma og autograph. Hasta ang tag-iya sa Benedicto College ug ang iyang mga anak nakigsawo sa kasadya sa wala damha nilang paghimamat ni Pacman.

Gisulat ko kining lindog kay mura man gud og madyik nga nahinayon ang maong duwa. Tiaw muna sud lamang sa pipila ka oras nga pagpahibalo ug pagplantsa sa pipila ka mga kakulian, amo kining napahigayon nga hapsay. Mao nang mapasalamaton ko'g daku sa staff sa Benedicto College, sa UABC ug ingon man sa Club Monday nga masinabtanon kaayong mi-extend sa among oras.

Kun mangutana mo kinsay midaog, ayaw na lang. Akong ikasulti nga sa dihang gibiyaan mi og 18 puntos sa nanghinapos nga bahin sa ikatulong kuwarter, akong gi-adto ang scorer aron ipatabla ang iskor, 52-52. Sa dihang nahuman ang duwa, kami maoy mananaog sa iskor nga 79-76. He-he.

* * *

Mga higala ayaw diay ninyo sipyata ang "Battle of the Best Bantamweight" boxing promotion karong gabii diha sa Cebu Coliseum. Si WBO bantamweight champion Gerry Peñalosa makigharong sa Meksikanong si German Marez sa main event. Kinahanglan gyud kining tan-awon sa mga Sugbuanon gumikan kay mao na kini ang katapusang away ni Peñalosa sa Pilipinas. Iyang gituyo nga dinhi kini mahitabo agi'g pasalamat sa iyang mga fans kay dinhi man siya nagsugod sa iyang career ug nihimo og pangan sa natad sa pamuksing. Mahinungdanon sab ang maong away ni Peñalosa kay mao man kini ang yawi aron mahinayon ang gikatakda niyang away batok ni WBO super bantamweight champion Juan Manuel Lopez karong Abril 24 didto sa San Juan, Puerto Rico. Good luck Gerry!

* * *

Kun dunay mga pangutana og reaksiyon, mahimong mo-mail sa [email protected]

o tawag sa 253-1276 local 241. - BANAT NEWS