PSC nangandam na sa 25th SEA Games

CEBU, Philippines - Gisugdan na sa Philippine Sports Commission  (PSC) ang ilang halapad nga pagpangandam alang sa 25th Southeast Asian (SEA) Games didto sa Laos karong Disyembre. Atol sa fellowship gathering nga gipasiugdahan sa Philippine Amusement and Gaming Corporation (PAGCOR) didto sa Parañaque, si PSC chairman Harry Angping mihangyo sa mga presidente ug secretary generals sa nagkalain-laing National Sports Association (NSA) sa paghulma og lig-on nga team ngadto sa biennial sports conclave.

Si PSC commissioner ug executive director Fr. Vicente ‘Vic’ Uy, SVD miingon nga hilabihan nilang kalipay tungod sa kadaghan sa nanambong sa maong tigum ug 95 porsiyento ang nitambong.

“We are so happy that many had attended the fellowship hosted by PAGCOR, approximately there was a 95% attendance. Of course with the new administration under Chairman Angping, this is our way of reaching out to POC and we are glad that they have a positive response to it,” matud pa ni Fr. Uy.

Matud pa ni Fr. Uy nga aduna lamang 25 sa 40 ka events ang batukan sa SEA Games ning tuiga tungod sa kakulang sa mga kasangkapan sa host country.

Kini naglakip sa athletics, swimming, wrestling, taekwondo, wushu, karate, pencak silat, judo, boxing, fin swimming, weightlifting, muay thai, lawn tennis, soft tennis, petanque, billiards/snooker, sepak takraw, archery, cycling, badminton, table tennis, shuttlecock kicking, golf, volleyball ug football.

Nagkanayon si Fr. Uy nga mobubo sila og dakung suporta ngadto sa mga atleta kinsa adunay daku’g kahigayonan nga modaog og medalya, bisan og nipasalig sila nga mopaluyo sa laing NSAs nga adunay potensiyal nga atleta nga sarang modaog ning dakung kompetisyon.

“We will give our full support to all NSAs and their athletes who have greater chances to get medals based on their performances,” sumala pa ni Fr. Uy.

Sa laing bahin, napanid-an ni Fr. Uy ang kahapsay sa pagpadagan ni Angping sa PSC ug gani matud pa niya nga adunay daghang mga kausaban sukad kini milingkod sa maong posisyon. - BANAT NEWS