USC, USJ-R mag-ilog sa no. 1 spot

CEBU, Philippines - Padayonon karon ang aksiyon sa Cebu Schools Athletic Foundation Inc. (CESAFI) beach volley tournament diin magsangka ang walay pildeng mga koponan University of San Carlos (USC) ug ang University of San Jose-Recoletos (USJ-R) nga moila sa topnotcher sa elimination round sa men’s division diha sa Wiggy’s Beach Resort sa Lilo-an, Cebu.

Ang duha pulos nagbitbit og 3-0 win-loss records diin ang defending champion USC  ug ang challenger nga USJ-R magsangka alang sa penultimate round.

Ang tandem nilang Roderick Arenasa ug Kennith Bensig sa USC ni coach Eugene de la Cerna, nagtinguha mokulit sa makasaysayanon nga three-peat, apan kinahanglan makalusot kini sa hinugtanay nga sangka batok sa paresan nilang Ariel Carumba ug Louijie Tipgos sa USJ-R.

Sa dili pa harungon ang USJ-R, ang USC moharong una sa tandem nilang Jade Becaldo ug James Ryan Rivera sa University of the Visayas (UV) karong buntag, samtang ang USJ-R makigsangka batok nilang Edward Ybañez ug Christopher Ryan Abut sa University of Southern Philippines Foundation (USPF).

Sa pikas bahin, ang gamhanang USPF nga gibitoonan nilang Ericka Camille Verano ug Harlene Ybarita naglaraw nga molansang sa ilang ikalimang sunod-sunod nga daog dihang ilang sangkaon ang defending champion USJ-R ni Cebu Sports Hall of Famer coach Grace Antigua.

Suwayan sab sa USPF ni coach Jordan Paca nga moposte sa ikaunom nilang sunod-sunod nga daog batok sa USJ-R nilang Joy Bonita ug Rachelle Hannah Singson aron maangkon ang labing taas nga posisyon sa women’s division.

Sa dili pa ang ilang sangka batok sa USPF, ang USJ-R moharong una sa University of Cebu (UC) nilang Blanca Anguis ug Sheila Marie Padayogdog.

Ang tandem nilang Danika Gendrauli ug Lorie Mae Layno sa Southwestern University (SWU), kinsa nagbitbit og 4-1 win-loss record makigpinaksitay nilang Jerymie Montalvo ug Chona Gesulga sa USC nga maoy pasiunang duwa karong adlawa nga gikatakda sa alas-8 sa buntag.

Ang aksiyon karong adlawa maoy moila sa upat ka semifinalists sa matag dibisyon.

Ang crossover semis tigian ugma sa buntag ug dayon ang duwa alang sa ikatulong dapit ug ingon man ang championships. - BANAT NEWS