USC, USJ-R spikers pabiling walay pilde

CEBU, Philippines – Mikudlit sa ilang ikatulong sunod-sunod nga kadaugan ang defending champion University of San Carlos (USC) ug ang lig-ong title contender University of San Jose-Recoletos (USJ-R)    aron saw-an ang liderato sa men's division sa Cebu Schools Athletic Foundation, Inc. (CESAFI) Beach Volley niadtong Domingo didto sa Wiggy's Beach Resort sa Liloan, Cebu.

Ang USC nilang Roderick Arenasa ug Kennith Bensig mipukling sa University of Southern Philippines (USPF) nila ni Edward Ybañez ug James Ryan Abut sa straight sets, 21-10. 21-19.

Padayon sab nga nagpamahit ang kainit sa USC ni coach Eugene de la Cerna dihang ilang gipakaging ang Cebu Doctors' University (CDU) nilang Edison Lim ug George Tampon, 21-10, 21-6.

Ang USJ-R ni Cebu Sports Hall of Famer coach Grace Antigua nagpaila nga usa sila sa mga lig-on ug lisud buntogon nga teams human gipilde ang University of the Visayas (UV), 21-15, 21-20.

Sa sayo pa, ang USJ-R nilang Ariel Carumba ug Louijie Tigpos nga gipaluyohan sa Ave Maria Sanctuary Park, milubong sa University of Cebu (UC) ubos sa tandem nilang Spencer Abejo ug Paolo Cabase, 21-14, 21-13.

Wala buligi'g maayong kapalaran ang UC dihang gipahamtangan sila og laing kapildihan batok sa USPF, 19-21, 10-21.

Karong Sabado, ang walay pildeng mga koponan USC ug USJ-R magsangka aron pag-ila sa topnotcher sa elimination round.

Sa pikas bahin, ang USPF nga gibitoonan nilang Ericka Camille Verano ug Harlene Ybarita milansang sa ilang ikalimang daog pinaagi sa pagpukan sa Southwestern University (SWU) sud sa tulo ka sets, 20-21, 21-14, 15-9 ug gisunod pagtumba ang USC, 21-20, 21-14 niadtong Sabado.

Niadtong Domingo, ang USPF ni coach Jordan Paca mikutlo og duha ka daog. Ang USPF unang midaog batok sa UV nilang Ivy Abella ug Noriena Castro, 21-11, 21-8 ug gisunod ang UC nilang Blanca Anguis ug Sheila Marie Padayogdog.

Gipakauwawan sa USPF ang defending champion USJ-R nilang Joy Bonita ug Rachelle Hannah Singson, 21-15, 21-9 ug dayon ilang gidemolis ang CDU nilang Linette Auza ug Niña Perez, 21-17, 21-12.

Ang USC nilang Jerymie Montalvo ug Chona Gisulga mipahayag sa ilang kahigayonan pag-angkon og luna sa semis pinaagi sa pagposte og kadaugan batok sa USJ-R, 21-18, 21-10 ug sa CDU, 21-12, 21-11. –BANAT NEWS