USJ-R, USC gisubhan daog sa CESAFI beach volley

CEBU – Gisubhan og daog ang defending champions University of San Jose-Recoletos (USJ-R) ug University of San Carlos (USC) sa pagsugod sa 3rd Cebu Schools Athletic Foundation, Inc. (CESAFI) beach volley tournament kagahapon didto sa Wiggy's Beach Resort sa Liloan, Cebu.

Miagi una og kalbaryo ang USJ-R belles ni Cebu Sports Hall of Famer coach Grace Antigua sa wala pa nila mabuntog ang Cebu Doctors' University (CDU) ubos sa tandem nilang Linette Auza ug Niña Perez, 21-14, 21-19.

Tungod kay wala man makaduwa ang ilang star player nga si Michelle Simbajon tungod sa injury atol sa ilang praktis sa miaging semana, si coach Antigua napugos pagpaduwa sa ilang rookie player nga si Rachelle Hannah Singson aron maoy modasdas sa opensiba uban ni Joy Bonita.

Human sa yano nilang kadaugan sa first set, ang USJ-R gipaningot og maayo sa ikaduhang hut-ong dihang ilang namatikdan nga lisud gyud ikaaway ang CDU. Ang kampo ni Antigua igo lang nakalabaw og dos, 18-16, apan ang CDU miharos og daog sa sunod nga tulo ka frames aron pag-ilog sa bentaha, 19-18.

Hinuon ang Ave Maria Sanctuary and Park-backed USJ-R, mibawos aron hingpiton ang kadaugan.

Dobleng kastigo ang nadawat sa CDU dihang nabiktima sab sila sa Nestea Beach Volley national finalists Ericka Camille Verano ug Harlene Ybarita sa University of Southern Philippines Foundation (USPF), 9-21, 5-21.

Wala sab magpabitin ang Southwestern University (SWU) ubos nilang Danika Yolanda Gendrauli ug Lorie May Layno, kinsa mimakmak nilang Noriena Castro ug Ivy Abella sa University of the Visayas, 21-13, 21-14.

Sa laing bahin, nagpakita dayon sa ilang abilidad sila si Jerymie Montalvo ug Chona Gesulga sa USC pinaagi sa pagkulit og 21-11, 21-16 nga kadaugan batok nilang Sheila Marie Padayogdog ug Blanca Anguis sa University of Cebu (UC), 21-11, 21-16.

Sa men’s bracket, USC nilang Roderick Arenasa ug Kennith Bensig mipukan nilang Paolo Cabase ug Spencer Abejo sa UC, 21-12, 21-10.

Samtang ang paboritong title contender nga silang Ariel Carumba ug Louijie Tipgos sa USJ-R milampurnas nilang Edison Lim ug George Tampon sa CDU, 21-1, 21-5, ug ang pambato sa UV nga silang Jade Becaldo ug James Ryan Rivera mimakmak nilang Edward Ybañez ug James Ryan Abut sa USPF, 21-16, 21-14. – BANAT NEWS