Ornopia misakmit korona, duha ka runners-up

CEBU - Gipakita ni reigning “Rider of the Year” Seigfred Ornopia nga haom ang iyang desisyon nga molumba ubos sa bag-ong kategoriya sa 4th MS Motosuit Motocross Series nga gipaluyohan sa Castrol Philippines dihang iyang nasakmit ang championship trophy ug duha ka runner-up trophies sa first leg ning usa ka tuig nga kompetisyon nga giulohan og “8th Barangay Captain Manuel Wagas Cup” niadtong Domingo didto sa Sitio Tuburan sa Jubay, Liloan.

 Si Ornopia, kinsa nakigtige ubos sa executive class sa milabay nga tulo ka tuig, mipakita na karon sa beginners open production ug novice open production class.

Bisa’g nakigbangga siya batok sa mga batan-ong kaatbang, si Ornopia sa Keiz BJ Motorsales and Services nakahimo gihapon pagsakmit og titulo sa beginners open production.

Si Ryan Quirol nalandig sa ikaduha, samtang ang mini class overall winner sa miaging tuig nga si Keith Galaura napunta sa ikatulo. 

Mibanat sab si Ornopia sa executive A category, apan pakyas kini pagdaog sa unang dapit nga gidominar ni Jun Enriquez.

Naangkon sab ni Ornopia ang ikatulo nga dapit sa novice open production, diin iyang gisundan si John-John Flores, kinsa nahimutang sa ikaduhang dapit.

Napun-an ang kalipay ni Ornopia dihang ang iyang anak nga si Earl Jean Byrlle maoy nanghawod sa peewee category.

Si Tommy Narcosa maoy niangkon sa ikaduhang luna ug gisundan nilang BJ Pepito, Marian Yapparcon ug Kerry Ornopia.

Sa iyang bahin, si Jon-Jon Adlawan mipakita sa iyang bangis nga performance pinaagi sa pagpanghawod sa expert class. Iyang gipilde si Wensor Famorca, samtang si Weng Yapparcon maoy mipatong sa ikatulo.

Si Butch Flores maoy naghari sa executive C, wala sab magpaalkansi si Edsel Gohitia nga maoy midaog sa executive B, si Martin Nuñez maoy sab ang nag-una sa local enduro ug si Ayen Ledesma maoy napiling best rider sa novice enduro.  (BANAT NEWS)