Heartvit, Eyeberry 'daog

Cebu - Managsuong koponan Heartvit '93 ug Eyeberry '86 miratsada og daog pinaagi sa pagpukan sa ilang tagsa-tagsa ka kaatbang sa nagpadayong aksiyon sa University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.

Ang Heartvit '93 nagsalig sa mainitong rally sa tunga-tungang bahin sa duwa aron pagbuntog sa 1-Utak '96 sa iskor nga 71-63, samtang ang Eyeberry '86 mipusoy sa Pustahan '80 sa iskor nga 62-51.

Ang Heartvit ug Eyeberry parehong gi-agak ni Brgy. Tisa top councilor Jeson L. Guardo.

Si kanhi USC Warrior ug one-time league MVP Leon Floro 'Bong' Eleazar miburak og 31 puntos alang sa Heartvit '93 nga mibuak sa 19-all nga panagtabla aron pagposte og nuybe puntos nga bentaha sa halftime, 41-32. Giinat sa Heartvit '93 ang ilang labaw ngadto sa 12 puntos, 56-44 ug wala na kini molingi pa sukad niadto hangtod nga ilang naangkon ang tam-is nga kadaugan.

Sa laing bahin, si Arturo Pepito 'Pitoy' Mata mipabuto og 19 puntos aron pangulohan ang Eyeberry. Nabitin ang Eyeberry sa unang 10 minutos sa duwa, 11-16, apan nakabawi kini sa sunod nga duha ka kuwarter aron pag-ilog sa labaw, 48-41 dayon na ngadto pagposte og 11 puntos nga kadaugan.

Ang USCBHABA tilt gipaluyohan sab sa Uniherb Philippines, usa sa nag-unang health companies sa nasud nga nag-apod-apod sa nabantog na kaayong food supplements sama sa Arthro, Kidneycare, Heartvit, Diabet ug Eyeberry. – BANAT NEWS