CIIB nasumpo sa MLS

CEBU – Nasumpo sa MLS quintet ang Criminal Intelligence and Investigation Bureau (CIIB) pinaagi sa paghatag niini sa labing una nilang kapildehan human sa upat ka duwa sa iskor, 80-71 atol sa pagbalik sa Labangon Youth Association (LAYA) 1st Ritchie Osmeña Cup sa miaging gabii didto sa Labangon Sports Complex.

Gipangulohan ni Nelson Luague ang opensa sa MLS pinaagi sa iyang 26 puntos apan si Bern Yalana maoy miduslit sa ilang mainitong rally sa fourth period aron makahipos og 19 puntos. Siya ang manghod ni Police Supt. George Ylanan, ang hepe sa CIIB.

Mi-ambit sab sa nagkayong rally si Marlon Siaotong kinsa mitampo og 18 puntos alang sa kadaugan sa MLS kinsa naghupot na karon og 3-2 nga baraha, dili layo sa CIIB kinsa mao gihapo’y nag-una sa ilang 3-1 nga baraha.

Sa sayo pa, ang LAYA Green ubos sa pagpangu sa presidente sa LAYA nga si Robbie Ylanan, milampurnas sa undermanned nga LAYA-Gold sa iskor, 84-69 nga maoy nakapatidlum sa nauwahi ngadto sa labing ubos sa team standing sa ilang 0-4 nga baraha.

Si Martin Pasana maoy nangu sa LAYA Green pinaagi sa iyang 21 puntos aron abagan ang iyang team pagkulit og 2-2 nga baraha.

Laing upat ka teammates ni Pasana mi-iskor sab og double figures samtang sila si Rollon ug Jerome Hisoler maoy nangu sa LAYA Gold sa ilang 24 ug 16 puntos.

Puntos kada usa:

First Game:

LAYA-Green (84)—Pasana 21, Sangara, Navaja 13, Ynot 12, Abella 11, Ylanan 3, Pañares 3, Gallardo 2

LAYA-Gold (69)— Rollon 24, Hisoler 16, Along 13, Rustere 11, Solon 5

Second Game:

MLS (80)— Luague 26, B. Ylanan 19, M. Siaotong 18, Enriquez 7, Parba 4, Siatong 4, Banglus 2

CIIB (71)—Veloso 29, Bugtai 14, Mandaros 10, Plasus 7, Dignos 4, Quiton 4, Pandong 3, G. Ylanan 2 (Gabby G. Malagar) (BANAT NEWS)