HEAT NAMUGNAW VS. CAVS

CEBU - Sa mga nanglabay nga katuigan, kanunay gyud magkalisod sila si LeBron James ug ang Cleveland Cavaliers sa pagpugong kang Dwayne Wade sa Miami Heat apan kagahapon, lahi ang gipakita sa Cavs ug sa ikaduhang higayon, gisalbar ni James ang iyang team human ilang gipabugnaw ang Heat sa iskor 93-86 sa nagpadayong aksiyon sa National Basketball Association (NBA) didto sa Quicken Loans Arena sa Cleveland, Ohio. Mao kadto’y ikaduhang higayon ning semanaha nga naka-rally ang Cavaliers gikan sa hulga sa ilang mga kaatbang pagputol sa ilang home winning streak dihang ilang gipilde ang Washington Wizards.

Ang Cavaliers pabilin gihapon hapsay ang record didto sa ilang korte nga nahimo nang 16-0.

Didto sa Arco Arena sa Sacramento, California, sagol kapungot ang gipahamtang sa defending champion Boston Celtics ngadto sa Sacramento Kings kinsa ilang gilampurnas og 45 puntos sa iskor, 108-63 aron malikayan ang ikatulong pagkahagsa didto sa estado sa California.

Si James mao gihapo’y nangu sa Cavs pinaagi sa iyang nahipos nga 33 puntos uban ang unom ka rebounds ug walo ka assists samtang si Mo Williams mibahug og 20 puntos.

“He’s a difficult player to guard. But we’ve grown as a defensive team,” matod pa ni James isip pagdayeg ngadto kang Wade.

Ang Cavaliers nabiyaan og siyam ka puntos sa pagsugod sa fourth period ug nabiyaan pa kini’g pito ka puntos, 68-75 sa may 8:09 ang oras sa fourth period pinaagi sa tirada sa ilang rookie nga si Michael Beasley apan kalit lang misukli og 18-2 run ang Cavs ug ilang na-outscore ang Heat, 26-11 sa kataposang walo ka minutos sa ilang sangka.

“You can tell the fans are into it. They don’t want us to lose all season. It’s the third quarter and they’re getting a little antsy, we hear it,” matod pa ni James kalabot sa ilang pagharus sa ilang homecourt.

Si Ben Wallace kinsa mi-iskor lang og dos puntos apan may 14 ka rebounds, mikomedya pinaagi sa pag-ingon “We call that good clock management.”

Si Anderson Varejao mitampo ug 12 puntos samtang si Zydrunas Ilgauskas mi-iskor ug 10 puntos alang sa Cavs nga aduna nay 26-4 nga baraha.

Ang Heat nga naghupot karon ug 16-13 nga baraha, gipangulohan ni Wade kinsa mipusa ug 29 puntos lakip niini ang upat ka rebounds ug walo ka assists. Si Udonis Haslem kinsa naka-angkon ug samad sa iyang tuong kilay, mitampo ug 15 puntos samtang si Daequan Cook may 12 puntos alang sa Heat.

Sa laing duwa, midaug ang Denver Nuggets batok sa New York Knicks, 117-110, giukata sa Dalals Mavericks ang Los Angeles Clippers, 98-76, naka-ipsot ang New Orleans Hornets batok sa Indiana Pacers, 105-103 ug gilampaso sa Los Angeles Lakers ang ilang silingan nga Golden State Warriors, 130-113 . (BANAT NEWS)