Laput midaug sa WBO Intercon superbantam division

CEBU - Nilampos ang taga-Mindanao nga si Ramie Laput sa pagsakmit sa bakanteng World Boxing Organization (WBO) Intercontinental superbantamweight dihang iyang gikulata si Donriel Marcos sa ilang away niadtong miaging adlaw didto sa Digos City.

Si Laput maoy nakabaton og dakong pabor sa maong away dihang gigamit niini ang iyang footwork inubanan sa mga jabs ug right uppercuts sa matag round aron mapukan si Marcos.

Tungod sa bangis nga atake ni Laput, nihubag ang nawong ni Marcos human sa away nga nasaksihan mismo sa WBO vice-president Leon Panoncillo.

Ang maong kadaogan maghatag kahigayunan ni Laput nga musaka sa mas taas nga ranking sa WBO superbantamweight division, diin siya nahimutang sa rank No. 12.

Si Laput nagbaton na karon og duha ka regional title, kahinumduman nga si Laput nisakmit usab sa WBO Asia Pacific belt dihang nidaog kini sa iyang away dinhi sa Sugbu. – BANAT NEWS