Black milandong sa Light Blue sa usc-sc ptca

Cebu - Ang Black Team nga gipaluyohan ni Jeson Guardo, mitabon sa Light Blue-Faculty squad pinaagi sa pag-iskor og 87-82 nga kadaugan aron pagkuha’g 2-0 nga baraha sa nagpadayon nga USC-SC PTCA, Inc. basketball tournament didto sa South Campus covered court sa dalan J. Alcantara ning dakbayan.

Sa lain pang mga duwa, ang guest team USC Alumni gikan sa North Campus mipukan sa Yellow Team ni Cesar Ortega sa iskor, 79-68, samtang ang Green Team-A milampurnas sa Violet Team ni PTCA president Dr. Hermes Ibon sa iskor , 90-76 samtang ang Navy Blue Team ni board auditor Jessie Gabatan milatos sa White Team sa iskor, 73-55.

Mipahigayon og upat ka duwa sa labing unang higayon sukad gibuksan ang torneyo sa USC-SC PTCA, Inc. kaniadtong Nobyembre 30 atol sa tinuig nga kasaulogan sa Family Day kaniadtong Domingo, Disyembre 14 nga gitambongan gyud mismo ni Fr. Vicente L. Uy, SVD, ang commissioner sa Philippine Sports Commission (PSC) nga kanhi sab dakung opisyal sa University of San Carlos isip kanhi vice-president for administration ug vice-president for finance.

Si Ronald Libre maoy nangu sa Black pinaagi sa iyang 16 puntos ug tungod kay mas daghan ang naka-iskor sa ilang kauban kung itandi sa Light Blue, wala na makasustenir ang nauwahi nga gipangulohan ni Ope Abellana kinsa mibugha og 31 puntos.

Nawagtang lang sab sama sa bula ang 27 puntos nga natampo ni Jay Oyao ug ingon man ang 18 puntos nga natampo ni Rodel Sartagoda ug ang 12 puntos ni Re-Ed teacher ug composer Jufel Querikiol alang sa Light Blue.

Si Bong Eleazar maoy nangu sa North Campus Alumni pinaagi sa iyang 17 puntos ug si Norwin Resma mi-iskor og 13 puntos alang sa Yellow.

Si Boy Omaña maoy mitimon sa Green Team pinaagi sa paghakot ug 24 puntos samtang ang beteranong commercial player nga si Abe Galinato mihipos og 14 puntos.

Maayo untang nakaduwa si Dr. Ibon kinsa mitampo og 11 puntos apan tungod kay kuwang man sila og players, wala na sila makasustenir sa kadugayan.

Ang Violet gipangulohan ni Mike Andales nga mihipos og 27 puntos.

Sa sayo pa, gipangulohan ni kanhi SWU Cobra Alvin Plaudin ang Navy Blue pinaagi sa iyang 17 puntos samtang si Gabatan may walo ka puntos ug ang kanhi opisyal sa PTA nga si Engr. Rick Fornis igo lang naka-iskor og duha ka puntos.

Mopadayon ang duwa sa USC-SC PTCA, Inc. karong umaabot Domingo diin tinguha sa Black Team nga makakulit og 3-0 nga baraha.

Puntos kada usa:

First Game:

Green (90)—Omaña 24, Galinato 14, Camacho 10, Alvarez 7, Gappi 6, Ibon 5, Aberion 4, Paca 4, Abatayo 2, Abines 2, Cagalitan 2

Violet (76)—Andales 27, Rivera 16, Bato 12, Ibon 11, Magno 8

Second Game:

USC North (79)—Eleazar 17, Sievert 10, Zanoria 10, Odulio 9, Diaz 8, Wong 7, Jacobe 5, Monsanto 2, Cotelo 2, Auza 2

Yellow (68)—Resma 13, Ortega 11, Alforque 9, Diaz 7, Loquias 7, Omelig 5, Ibon 5, Dela Torre 5

Third Game:

Navy Blue (73)— Plaudin 17, Bacalan 13, Ebarle 12, Blanco 11, Gabatan 8, Salaritan 6, Mijares 4, Fornis 2

White (55)—Cala 14, Gajudo 12, Soco 8, Ribo 8, Calo 7, Nacario 6

Fourth Game:

Black (87)—Libre 16, Gutierrez 13, Adarna 11, Lazaga 9, Nazareno 8, Jerez 6, Laxa 5, Casas 4, Villaner 2

Light Blue (82)— Abellana 31, Oyao 27, Sartagoda 18, Querikiol 12, Najarro 8. - Gabby G. Malagar (BANAT NEWS)