Mepranum mo-away sa undercard

CEBU – Laing pinoy boxer nga si Richie Mepranum ang makigsangka usab karon sa undercard sa Pacquiao- De la Hoya bout. Ang garbo sa Maasin, Saranggani gikatakdang modepensa sa iyang World Boxing Organization (WBO) Oriental flyweight title batok sa Amerikanong si Cesar Lopez.

Si Mepranum kinsa mitimbang og 113 lbs sa weigh-in kagahapon mao ang bugtong Filipino nga boksidor nga mokatkat sa ring uban ni Pacquiao.

Nagkanayon si Mepranum nga mao kini ang kinadak-ang away sa iyang karera karon isip boksidor. Si Mepranum gipaabot mopakita og maayong labok batok sa taga- El Paso Texas nga si Lopez kinsa may gibug-aton nga 114 lbs.

Matud pa sa south paw nga si Mepranum nga iyang sundon ang istilo sa pagpamuksing sa pambansang kamao atol sa ilang eight round match ni Lopez. “ I likened my style to Manny. I go in, out and in, out,” matud pa ni Mepranum, “I am very excited with this fight since this will be my first visit to Las Vegas. I will do my best”, Dugang pa ni Mepranum.

Gi-asoy usab sa iyang trainer nga si Nathan Tinangsak nga ang job ug straight ni Mepranum ang ilang gamiton isip hinagiban sa pagpukan nila ni Lopez.

Si Mepranum nagkupot karon og rekord nga 18-1-1, 7 KOs samtang si Lopez adunay rekord nga 24-6. (Lemuel P. Maglinte) (BANAT NEWS)