Air21, Sta.Lucia buk-on ang panagtabla

CEBU – Buk-on karon sa Sta.Lucia Realtors ug Air21 Express ang ilang panagtabla sa standing dihang mag-sangka sila karon sa main game sa nagkanit nga aksiyon sa KFC-PBA Philippine Cup didto sa Araneta Coliseum Quezon City.

Sa dili pa ang ilang lahugay sa alas-6:30 sa gabii, mag-abot una ang dalan nila ni Asi Taulava sa Coca-Cola Tigers ug ang kanhi niining koponan nga Talk N’ Text Tropang Texters sa ilang engkwentro nga gikatakdang sugdan sa alas-4 sa hapon.

Ang Express kinsa bag-o pa lang nilampos sa katapusan nilang duwa batok sa Barangay Ginebra Kings niadtong miaging Biyernes, 102-84 naglaum karon nga mudaog batok sa defending All-Filipino Champion nga Realtors aron mapalambo pa ang ilang 7-7 win-loss nga baraha paingun ngadto sa semis.

Si Express coach Bo Perasol nagkanayon nga human nila gipaluhod ang Kings, nidako karon ang ilang kompiyansa nga modaug sila sa ilang umaabot pang mga sangka batok sa mga dekalibreng koponan. Itugyan ni Perasol ang duwa karon sa sinaligang si Gary David nga maoy mubahog karong adlawa. Si David mipabaha og 24 puntos sa katapusan nilang duwa aron pangulohan ang ilang ratsada batok sa Kings. Dili lang si David ang angayang bantayan sa Express, gipaabot usab nga mokiat mao sila si Arwind Santos, Ranidel de Ocampo ug Niño Cañaleta.

Sa ilang bahin, ang Realtors ni coach Boyet Fernandez nanganti usab nga modaug karong adlawa. Sama sa Express, ang Realtors mugamit sa tanan nilang kusug aron mapalambo pa ang ilang 7-7 win-loss nga baraha.

Si Fernandez magsandig sa iyang mga cager nga sila si Kelly Williams, Ryan Reyes ug beteranong si Dennis Espino. (Lemuel P.Maglinte) (BANAT NEWS)