Air21 bagsak sa Purefoods

Sumandal ang Purefoods sa mainit na paglalaro nina Kerby Raymundo, James Yap at Enrico Villanueva tungo sa kanilang 96-88 panalo laban sa Air21 sa pagdalaw ng KFC-PBA Philippine Cup sa Tacloban Convention Center sa Tacloban City kahapon.

Tumapos ng 27-puntos si Raymundo na sinundan ng 26 ni Yap at 23 ni Villanueva para makasulong ang Purefoods sa 7-7 karta matapos ang kanilang back-to-back win.

Nalasap naman ng Express ang kanilang ikalawang sunod na kabiguan at ikapito sa kabuuang 13-laro para sa 6-7 record.

Samantala, bibisita naman ngayon ang PBA sa ating mga kababayan sa Singapore para sa pagdaraos ng sagupaan ng San Miguel at Talk N Text.

Nakatakdang magsagupa ang Beermen at Tropang Texters sa alas-5:00 ng hapon na parehong hangad ang back-to-back win.

Nasa ikalawang puwesto ang Beermen na may 8-5 kartada sa likod ng nangungunang Alaska na may 9-4 win-loss slate habang katabla naman ng Talk N Text sa 6-6 record ang Barangay Ginebra.

Nais masundan ng Beermen ang nakaraang 98-78 pananalasa sa Air21 na nagbangon sa kanila sa tatlong sunod na talo habang sisikapin namang maduplika ng Talk N Text ang 104-82 panalo laban sa defending champion Sta. Lucia Realty.

Sa unang pagkikita ng SMBeer at Tropang Texters, nanalo ang una, 84-77 noong October 17 kung saan nagbida si Jay Washington sa pagkamada ng 21-puntos.