Ornopia, Uypitching mag-ilog sa "Rider of the Year"

CEBU - Miani og maayong bonga ang mga paningkamot ni Seigfred Ornopia, kinsa maoy nag-una sa taas nga listahan sa overall champions sa 2008 MS Motosuit Motocross Series.

Si Ornopia sa Keiz BJ Motorsales and Services, mipupo og kinatibuk-ang 395 puntos sa 14-leg series sa executive-A division.

Kun ang top award mobasi sa puntos, si Ornopia maoy adunay katungod nga moangkon sa "Rider of the Year" ning tuiga.

Hinuon, ang organizers nagduhaduha pa kun ihatag ba ang award ngadto sa usa ka tawo o nganlan ang tanang top riders sa nagkalain-laing dibisyon isip "Riders of the Year."

Laing opsiyon mao nga ihatag ang award ngadto sa top expert rider. Pananglitan maoy mahitabo, ang award adto mapunta ni Irwin Ramas-Uypitching.

Si Uypitching, bisan napalta sa makadaghang higayon sa sayong bahin sa serye, nakamaneho pagkulit og 262 puntos sa expert category, nga igo na kaayo alang kaniya pagpukan sa Rider of the Year sa miaging tuig nga si Jovanni Abellar, kinsa mihipos lang og 226 puntos. Ikatulo lang si Pepo Rubi sa iyang 212 puntos.

Sa laing bahin, ang MS Motosuit image model nga si John Flores misakmit sa overall title sa beginner's open production pinaagi sa pagratsada og 286 puntos.

Ang makapaukyab sa overall standings mao ang bangga nilang Clark Wagas ug Rex Barbaso nga parehong mipupo og 280 puntos. Apan si Wagas maoy nakaangkon sa novice production overall crown human makapuwesto og maayo batok ni Barbaso sa tanang legs nga ilang giapilan.

Hinuon, angay sab nga magmaya si Barbaso kay siya man ang naghari sa intermediate class pinaagi sa iyang 225 puntos.

Bugtong si Bori Bustillo lang ang rider nga misakmit og double overall championship human mikolekta og 351 puntos sa local enduro ug 321 puntos sa novice enduro class.

Si Gener Sicad maoy milangkat sa executive-B overall title nga mihipos og 286 puntos, samtang si Butch Flores, kinsa maoy race announcer sa maong series mibira sa executive-C title nga miani og 278 puntos. – BANAT NEWS