RemEMBER, SCSIT milubong sa ilang kaatbang

CEBU - Ang team RemEMBER mipaulbo og 12-0 run sa katapusang tres minutos sa final quarter aron paglumpag sa 5th Avenue Telecom, 93-78 sa pagtak-op sa elimination round sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Bitbit ang 5-1 win-loss nga baraha, ang team RemEMBER nakasulod na sa quarterfinals isip top seed sa Bracket-B.

Sikit kaayo ang duwa gikan sa pagsugod, apan tungod sa “homecourt advantage” ang RemEMBER dasig kaayo nga nakaduwa ilabi na nga anaa ang presensiya sa ilang team manager ug Consolacion Vice Mayor Ember V. Alinsug.

Ang RemEMBER milusad og 12-0 run aron inaton ang ilang labaw hangtod nga ilang naangkon ang 15 puntos nga kadaugan.

Sa laing aksiyon, ang Salazar Colleges of Science and Institute of Technology (SCSIT) Baby Skyblazers yano sab kaayong milubong sa Athletes for Christ through Excellent Service (ACES) sa iskor nga 94-59.

Gitapos sa SCSIT ang classification round bitbit ang 5-1 nga nagtabla uban sa MLSDF Selection, apan ang naulahi maoy nakaangkon sa top spot sa Bracket-A pinaagi sa winner-over-the-other ruling.

Ang ganting salapi ug tipik sa kita ning tulo ka bulan nga torneyo nga gipasiugdahan sa M. Lhuillier Sports Development Foundation (MLSDF) pinaagi sa ilang executive director ug multi-titled coach Eddie B. Ybañez idonar ngadto sa charitable institutions.

Puntos Matag Usa

Unang duwa:

SCSIT (94) - Rabaya 18, Amarado 14, Aleguiojo 10, Tampus 10, Arribal 10, Llamedo 9, Paquibot 8, Bigno 6, Balaba 4, Salazar 3, Maurillo 2

ACES (59) - Amigabla 14, Milloren 11, Cañada 8, Ang 8, Pasumala 8, Pinzon 7, Guzon 3

 Ikaduhang duwa:

RemEMBER (93) - Dahil 26, Medida 23, Pilapil 9, Ermac 9, Sanchez 8, Tibon 7, Lavares 3, Rojas 3, Bio 3, Villamor 2

 5th Avenue Telecom (78) - Alon 16, Marques 15, Solis 12, Quilab 11, Guardiario 10, Mangin 5, Mananquil 5, Ababa 3, Cañete 1. – BANAT NEWS