4 martial experts, instructors gitakdang mo-anhi sa Sugbu

CEBU - Upat ka martial arts experts ug instructors, tulo niini gikan sa Australian ug usa ka Brazilian mobisita dinhi sa Sugbu karong Biyernes aron magbansay-bansay sulod sa usa ka semana diha sa Cacoy Doce Pares World Eskrima Federation sa dalan C. Padilla, ning dakbayan.

Pangulohan ni Grandmaster Vince Palumbo, usa ka tinun-an ni Grandmaster Ciriaco 'Cacoy' Cañete sud sa dugay nang panahon, ang laing tulo ka mga eskrimadors nga kuyog ni Palumbo mao sila si Grandmasters Christopher Nasilowski, Professor Leonardo Arruda ug Sensei Vickie Simos.

Si Palumbo, ang 9th degree black belter, usa sab ka world champion eskrimador sa South Pacific open weight division ug IKBBF world boxing champion sa middleweight division. Nahimo siyang kampiyon sa eskrima sa tuig 1993, 2005, 2006 ug sa 2007 ug IKBBF middleweight champion sa 2004.

Si Nasilowksi, usa ka international referee sa stickfighting tournaments ug promoter sa eskrima didto sa Poland.

Sa laing bahin, si Arruda usa ka Brazilian world jiujitsu ug Pan-Pacific champion. Nahimo sab siya nga eskrima champion sa middleweight division sa South Pacific.

Si Simos, kinsa kanunay mo-anhi sa Sugbu sama ni Palumbo, maoy South Pacific women’s eskrima champion ug eksperto sa boxing, karateka ug jutsika. – BANAT NEWS