Sasing, Verayo nidaog pagsugod sa kumbati

CEBU - Nipakita og maayong tilimad-on sila si Jonrey Sasing ug Rhovhyl Verayo sa pagsugod sa Asian Beach Games kagahapon didto sa Sanur Beach sa Bali, Indonesia.

Ang mga Sugbuanong si Sasing ug Verayo mipukan sa Pakistan nilang Hafiz Amjad Hussain Shahzad ug Zaheer Khan sa sunod-sunod nga sets, 21-14, 21-16 sa unang hugna.

Hinuon, napilde ang ubang Pinoy men's beach volleyball team. Sila si Benjaylo Labide ug Angelo Espiritu napukan nilang Qiang Yu ug Yanglu Li sa China, 11-21, 8-21.

Sa pikas bahin, ang female RP squads gilungkoban sa Sugbuanang Jusabelle Brillo ug Nerissa Bautista, Michelle Carolino ug Suzanne Roces nakabaton og first round bye.

Laing Sugbuanon nga nalakip sa RP squad mao si Jesus Duga sa bodybuilding nga mopakita sa iyang abilidad sa 75 kilograms event karong adlawa. Mopakita sab og aksiyon karong adlawa si Luis Ansag sa wrestling ug ingon man ang swimmer nga si Paul Abigail ug sepak takraw artists Metodio Suico Jr. ug Harrison Castañares. – BANAT NEWS