MCA disgrasya sa 5th Avenue

CEBU - Nalamdagan og maayo ang dalan sa 5th Avenue Telecom paingon sa semifinals dihang ilang gipukan ang kanhi way pildeng Mabolo Christian Academy, 87-79 sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Ang 5th Avenue ni coach Marvin Felicis maoy midiktar sa tiyempo sa maong duwa ug milabaw og kuwatro puntos, 39-35 sa halftime. Apan ang Mabolo CA cagers milusad og makalilisang nga pangatake sa ikatulong kuwarter aron pag-ilog sa labaw, 67-65 paingon na sa final quarter.

Hinuon, ang Mabolo CA wala makasustiner sa ilang momentum sa nanghinapos nga bahin sa duwa nga naghatag og higayon sa 5th Avenue Telecom pag-ilog og balik sa labaw dayon na pagkulit og daog.

Gumikan niini, ang 5th Avenue mao na ang nag-solo sa liderato sa Bracket-B sa ilang 3-0 nga baraha, samtang ang Mabolo nanaog sa ikaduhang dapit uban sa RemEMBER sa managsamang 3-1 win-loss records.

Puntos Matag Usa

5th Avenue Telecom (87) -- Mondragon 29, Ygay 12, Labagala 10, Cañete 8, Silva 8, Reyes 6, Agusto 6, Gayundatu 4

Mabolo CA (79) -- Orbeta 23, Olivares 13, Dajalos 10, Rodavia 8, Tabaquero 8, Rabaquero 8, Oyao 7. – BANAT NEWS