Brillo, Sasing milarga na paingon sa Indonesia

CEBU - Milarga na kagahapon sila si Jusabelle Brillo ug Junrey Sasing, duha sa lima ka Sugbuanon nga mo-compete sa 1st Asian Beach Games nga sugdan karong adlawa hangtod sa petsa 26 ning bulana sa Bali, Indonesia.

Ang uban nga moapas mao sila Luis Ansag (wrestling) ug Metodio Suico Jr. ug Harrison Castañares (sepak takraw).

Sila si Brillo ug Sasing pulos mga first timers sa international tournament.

Sa wala pa mobiya sa nasud, ang kanhi University of the Visayas (UV) standout nga si Brillo nagkanayon nga dili siya mosaad kay mubo ra ang iyang panahon uban sa ubang sakop sa nasudnong koponan.

Ang beach volleyball usa sa mga paugnat sa kusog nga gilaumang mohakot og medalya alang sa Pinoy contingent.

Sa iyang bahin, si Ansag bag-o lang nahibalik gikan sa Korea uban sa laing Sugbuanon nga sila si Marniel Dimla, ang pencak silat player, kinsa moduwa sab og wrestling.

Si Ansag, kinsa nidaog og silver medal atol sa world invitational tournament didto sa Korea, naglaum nga modaog na og gold sa iyang pagsalmot didto sa Indonesia.

Ang pencak silat nalakip sab sa inaugural Beach Games.

Laing sports event nga salmotan sa Pinoy athletes naglakip sa dragon boat, beach wood ball, beach soccer, surfing, sailing, marathon swimming, wind surfing, triathlon ug body building.

Ang beach basketball gisal-ot isip demonstration sport. – BANAT NEWS