Team-B nangayo pa'g overtime pagpilde sa Team-C

CEBU – Nagkinahanglan pa og overtime ang Team-B una nila napukan ang Team-C, 79-73 sa nagpadayon nga TTH Basketball Club niadtong Martes sa gabii didto sa USC-North Campus gym sa Gen. Maxilom Avenue, ning dakbayan.

Sa sayo pa, gipanitan sa Team-D ang undermanned nga Team-A sa iskor nga 79-58.

Ang Team-B kanunay naggukod ug gilubong og 10 puntos sa halftime, apan nakasikit kini pagkahuman sa third period sa iskor nga 47-49.

Nag-iyahay og ilog sa labaw ang duha ka kampo hangtod nga ang Team-C niposte og tres puntos nga bentaha, 66-63 human sa three shot ni Rainer Lim sa katapusang 30 segundos sa regulasyon. Apan ang Team-B dali kaayong nakabawos ug mitira sab og three points kortesiya ni Jansen Huntar aron sa pagpatabla sa iskor, 66-all sa daginutong oras nga maoy nakaingon sa overtime.

Sa dugang singko minutos,   miarangkada ang Team-B ug ilang gilupig sa scoring ang Team-C, 13-7 aron pagposte og daog.

Ang Team-B pabiling nag-una sa liderato bitbit ang 4-1 nga baraha, samtang ang Team-C naghupot og 1-4 nga baraha.

Ang kanhi USC Warrior nga si Fritz Villamor mihagdaw og 26 puntos, diin walo niini gikan sa overtime. Sila si Hiram Cuyno ug Huntar Ubay-ubay nagkumboya og 32 puntos.

Si Christian Bacus mao sab ang nangulo sa Team-C sa iyang 20 puntos, samtang si Lim miamot og 16 puntos. Si kanhi USP Panther nga si Henry Mancera ug Paeng Policios mitali sab og double figures.

Sa laing duwa, si Martin Grogard mihipos og 26 puntos aron pangulohan ang Team-D. Miabag sab si Mark Villagonzalo pinaagi sa iyang 24 puntos ug si 

Jong Enricuso mitampo og 15 puntos alang sa Team D.

Ang Team A gipangulohan ni Carl Umabong pinaagi sa iyang 18 puntos.

Unang duwa:

Team-D (79) -- Grogard 26, Villagonzalo 24, Enricuso 15, H. Lim 6, Marquez 4, Castañeda 4

Team-A (58) -- Umabong 18, D. Lim 14, Gica 12, Lim 11, K. Lim 3

Ikaduhang duwa:

Team-B (79) -- Villamor 26, cuyno 18, Huntar 14, Brigoli 7, Colmenares 6, Lo 2, Ho 2, Go 2, Aguas 2

Team-C (73) -- Bacus 20, R. Lim 16, Mancera 14, Policios 10, Jayme 6, Alferez 5, Sala 2  – BANAT NEWS