Dumlog bag-ong kampiyon

CEBU - Sayo nga nagpasko ang barangay Dumlog human nila gipilde ang Tabunok-1, 97-87 aron paglangkat sa korona sa senior's division sa Talisay City Mayor’s Cup 2008 basketball tournament niadtong miaging gabii didto sa Talisay City Sports and Cultural Center.

Ang Dumlog nalubong og 10 puntos human ang usa sa ilang sinaligan nga si Nestor Bardillas wala maka-iskor sa tibuok second quarter.

Hinuon, ang Dumlog dali kaayong nakabawi dihang ilang gilupig ang Tabunok 1 sa pinuntosay sa ikatulong kuwarter, 32-12 aron pag-ilog sa labaw ug gikan niadto ila gidominar ang duwa hangtod sa pagkahurot sa oras.

Lima ka magduduwa nga gipangulohan ni Bardillas Jr. ang mirehistro og double figures alang sa kadaugan sa Dumlog ni brgy. captain Charles Basillote.

Si Bardillas Jr., kinsa maoy MVP mibahog og 24 puntos, gisundan ni Karl Ocañada nga mitampo og 21 puntos, Albert Villaver sa iyang 16 puntos, Filomeno Garces pinaagi sa iyang 13 puntos ug si Jhake Villaver nga miamot og 12 puntos.

Ang pilderong Tabunok 1 gipangulohan ni Michael Bucao sa iyang 17 puntos.

Naglangkob sa Mythical Five mao sila si Peter Jake Alferez sa Tabunok 2, Karl Ocañada sa Dumlog, Nestor Bardillas Jr. sa Dumlog, Jezreel Meting sa Tabunok 1 ug Diosdado Iglamo Jr. sa Poblacion 1.

Sa gubat sa ikatulong dapit, ang Poblacion 1 naka-eskapo dihang ilang gipilde ang Tabunok 2 sa kulbahinam nga engkuwentro sa iskor nga 94-93.

 PUNTOS MATAG USA

Dumlog (97) -- Bardillas 24, Ocañada 21, Albert Villaver 16, Garces 13, Jhake Villaver 12, Gera 9, Cabigas 2.

Tabunok 1 (87) -- Bucao 17, Rios 16, Gaviola 11, Apa 10, Navaja 9, Meting 9, Pria 8, Dablo 7. (THE FREEMAN)