Flores Cousins daog na sab

CEBU - Gikuninitan sa Flores Cousins sa Consolacion ang Sunday Club, 78-74 alang sa ilang ikaduhang sunod-sunod nga daog sa basketball exhibition match didto sa Consolacion Sports Complex.

Sa miaging semana, ang Flores Cousins nakaikyas gikan sa mga kamot sa Paknaan Selection, 76-75.

Sa makausa pa, ang Flores Cousins nakalahutay gihapon sa nanghinapos nga bahin sa makutas nga duwa aron pagposte og  daog.

Si Semblante maoy topscorer sa iyang 16 puntos alang sa Flores Cousins, kinsa gibitoonan ni Paul Alelu, usa ka kanhi star player sa Far Eastern University (FEU) Tamaraws dihang niduwa pa kini sa UAAP.

Si Alelu mao karon ang barangay councilor sa Poblacion Oriental ug kawani sa Rizal Commercial Banking Corporation (RCBC) mitampo og 15 puntos.

Ang Flores Cousins gibiyaan og siyete puntos sa halftime, 32-39, apan mi-rally sa ikatulong kuwarter, 25-17 aron pag-ilog sa labaw, 57-56 paingon sa final quarter.

Ang maayong depensa usa sa mga hinagiban sa Flores Cousins pagbuntog sa Sunday Club.

Gawas sa nagpadayong Consolacion Fiesta Cup Basketball League, si Paul Alelu mopasiugda sab og 3-point-3 tournament sunod semana uban sa abag   ni Consolacion Vice Mayor Ember V. Alinsug. – BANAT NEWS