USPF nangharos sa slam dunk, 3-point shootout

CEBU- Ang rookie sa University of Southern Philippines Foundation (USPF) Panthers nga si Elwin Durano sa Tuburan, Cebu, maoy kampiyon sa slam dunk competition atol sa Cebu Schools Athletic Foundation, Inc. (CESAFI) Light vs. Dark All-Star Game gabii didto sa Cebu Coliseum.

Daan nang gitagna ni coach Raul Latonio, Sr. nga dili man tuod sila maka-abante sa semifinals, apan nanganti sa walay makabentaha ni Durano kun kabahin na sa slam dunk.

Natinuod ang panagna ni Latonio, apan ang wala niya matag-ani nga iya ra sab diay batos maoy modaog sa 3-Point Shootout tungod kay ang iyang top gunner nga si Moncrif Rogado mao sab ang nahimong kampiyon human siya maka-iskor og 44 puntos sa duha ka rounds ug iyang gilupig si Von Harry Lanete sa University of the Visayas (UV) Green Lancers nga igo lang naka-iskor og 31 puntos.

Ang taga Tuburan nga si Durano, mi-abante sa finals pinaagi sa iyang one-handed 360 degrees slam nga nakapahugyaw sa katawhan.

Sa finals, migamit siya sa iyang kauban nga si Jordan Bardilas isip iyang props nga gipabarog ubos og gamay sa free throw line ug  mihansak kini ginamit ang one-handed slam hinungdan nga nakakuha kini og perfect 10 points gikan sa lima ka judges.

Gilupig ni Durano ang laing duha ka higante sa CESAFI nga sila si Gregory Slaughter sa UV ug Jun Mar Fajardo sa University of Cebu (UC) Webmasters.

Ang USPF daw sa naka-grandslam tungod kay ang ilang university president nga si Engr. Rolando Villa mao man sab ang presidente sa CESAFI karon nga season.

Awhagon ni coach Latonio si Engr. Villa nga pasidunggan ug hatagan og cash incentives silang Durano ug Rogado tungod sa dungog nga ilang nahatag sa unibersidad.

Sa miaging tuig, si Eric Zanoria sa Southwestern University (SWU) maoy midaog sa slam dunk, apan wala makasalmot ning tuiga kay gisuspenso tungod kay nakalapas kini sa lagda sa CESAFI, samtang si Jessmar Villahermosa sa University of San Jose-Recoletos (USJ-R) Jaguars mao ang kampiyon sa 3-Point shootout ug wala sab mosalmot kay atua na kini nangindahay sa University of the East (UE) sa Manila. - Banat News