Baby Panthers tabok sa semis

CEBU - Gisakmit sa third-seed University of Southern Philippines Foundation (USPF) Baby Panthers ang ikaupat ug katapusang luna sa semifinals human makabawos ngadto sa University of San Carlos (USC) Baby Warriors, 75-56 sa ilang playoff kagabii sa 8th Cebu Schools Athletic Foundation, Inc. (CESAFI) basketball event didto sa Cebu Coliseum.

Pungtanon kaayong mipabuhagay og mga puntos ang Baby Panthers kansang pag-abante sa semifinals nalangay human sila maihaw sa Baby Warriors sa miaging adlaw sa iskor nga 58-64. Ilang gipakita kagabii nga mas angayan sila nga mo-abante, apan ang nakaparat kay naghuwat nila ang topseed nga defending champion University of the Visayas (UV) Baby Lancers.

Bisan og underdog sila batok sa Baby Lancers, si coach Camilo Go sa Baby Panthers nagkanayon nga ilang buhaton kutob sa ilang mahimo aron lang modaog sa UV nga kanunay moihaw kanila.

“Tan-awon lang namo unsay among mahimo basta fight lang gyud mi,” matud pa ni USPF head coach nga si Go.

Sikit kaayo ang unang tulo ka kuwarter ug gani, nabiyaan ang Baby Panthers og singko puntos sa opening period, 10-15. Apan sa ilang pangikamot, natabla nila ang iskor sa halftime nga 26-all.

Sa kalit lang, ang Baby Panthers mipahimulos sa daghang sayop nga nahimo sa Baby Warriors ug ilang gibiyaan ang ilang kaatbang pinaagi sa pag-iskor og 18-0 run sa oras nga 5:30 sa third period aron pag-abante, 50-36.

Miinat ang labaw sa Baby Panthers ngadto sa 54-36 una pa nakalihok ang naungot nga iskor sa Baby Warriors. Mihulga sab sila pagsikit, 54-66 sa katapusang 1:23 sa duwa, apan dali sab kaayong nakarekober ang Baby Panthers aron pagdagit sa daog.

Ang torotoy nga si Marvin Demana maoy nangu sa Baby Panthers pinaagi sa iyang 17 puntos, si Peter Cañete, Jr. mikabkab og 13 puntos, samtang laing tulo nila ka kaubanan ang mihirit og 11 puntos matag usa. 

Si Kim Jordan Nuñeza maoy nangu sa pilderong Baby Warriors sa iyang 12 puntos.

PUNTOS MATAG USA

USPF (75) -- Demana 17, Cañete 13, Ferraren 11, Arong 11, Nudalo 11, Caguindagan 6, Casalari 5, Silao 1

USC (56) -- Nuñeza 12, Reyes 8, Monteron 8, Adlawan 7, Nacua 6, Uy 6 Gabuya 5, Sepe 3, Kikuchi 1