Cebu Movers, AC Sports nakaangkon luna sa semis

CEBU - Diriyot madisgrasya ang Cebu Movers sa mga kamot sa McMill Enterprise pinaagi sa pagpilde, 64-62, samtang ang AC Sports mipakaging sa Evan Hulga Hardware, 87-60 aron pag-abante sa semifinals sa Guadalupe Athletic Association (GAA) 9th Founder’s Cup niadtong Domingo didto sa Guadalupe Sports Complex.

Ang knockout semifinals himuon karong Domingo diin magbagat ang Cebu Movers batok sa MELO, ang no. 1 sa Group-A, samtang ang AC Sports makigsangka batok sa G&S International diin ang mga mananaog magsangka sa finals.

Ang Cebu Movers maoy nagsige’g labaw gikan sa sinugdanan, apan wala sab magpabiya og daku ang McMill ug gani ila pa nga natabla ang iskor, 58-all sa nahabiling usa ka minuto sa fourth period.

Sila si Edgar Labra, Andy Suzara ug top gunner nga si Vincent Reyes maoy mipauwan og mga puntos alang sa Cebu Movers, apan ang mga crucial baskets nilang Joey Alquizola ug Boy Elizalde maoy nakapadaog sa koponan.

Moagi pa unta og overtime ang duwa, apan nasipyat ang dinaliang lay-up ni Shawin Jacalan hinungdan sa pagkahugno sa McMill.

Sila si Labra ug Reyes maoy topscorers sa Cebu Movers nga pulos mibugha og 14 puntos, samtang si Suzara miamot og 10 puntos. Sila si Alquizola, Elizalde ug Lodoñona miratsada og siyete puntos matag usa alang sa Cebu Movers.

Sa laing duwa, ang AC Sports nga miposte og 27 nga kadaugan batok sa Evan Hulga Hardware gipangulohan ni Rene Escuyos pinaagi sa iyang 23.

Si Lito Mabatid mao sab ang nangu sa pilderong Evan Hulga Hardware sa iyang 26 puntos, gisundan ni Gaga Cabanilla kinsa mitampo og 13 puntos.

Sa sayo pa, ang Team MELO mipakurat sa MGR sa iskor nga 67-64 ug ang G&S International mipukan sa Sign Post Advertising, 100-88.

PUNTOS MATAG USA

Unang duwa 

Cebu Movers (64) -- Labra 14, Reyes 14, Suzara 10, Alquizola 7, Elizalde 7, Lodoñona 7, Ancot 4, Labating 2

McMill (62) -- Llevado 13, Jacalan 12, Vertudazo 9, Delda 8, Granada 6, dela Peña 6, Tancio 4, Galan 2, Lanurias 2

Ikaduhang duwa

AC Sports (87) -- R. Escuyos 23, Cortes 16, Lopez 14, Ibo 13, Bacalla 8, Ancot 6, Rances 5, Lumapas 2

Evan Hulga (60) -- Mabatid 26, Cabanilla 13, Belmonte 6, Sullano 6, Albia 5, Pacaña 2, Barellano 2

Ikatulong duwa

MELO (67) -- Ocampo 27, Fernandez 15, del Rosario 10, Gelig 7, Barade 3, Baclayon 2, Hinacay 2, Mendoza 1

MGR (64) -- L. Posadas 10, Escuyos 16, Lumapas 12, Gabunada 10, Capili 4, Inocian 2, Pedrosa 2

Ikaupat nga duwa

G&S Intl. (100) -- Ararao 19, Jabines 16, Miñoza 13, Ladaran 11, Lavandero 8, Matudan 8, Miñoza 6, suan 6, Guillen 5, Segura 4, Bacalla 4

Sign Post Ad (88) -- Celestial 22, Cobacha 18, Mercader 16, Francisco 15, Echavez 8, Ariosa 3, M. Retiza 2, E. Retiza 2, Codilla 2